ბაგების უჩვეულო სიმშვიდეში, 160 კვადრატულ მეტრზე განლაგებული საცხოვრებელი სივრცე, რომელიც „Project Folie“-ს დამფუძნებელმა, თაკო კამკამიძემ საკუთარი ხელით შექმნა, მისი ინდივიდუალური გემოვნებისა და ესთეტიკის პირდაპირი ანარეკლია. ეს ინტერიერი გამორჩეულია Wabi Sabi-ის ფილოსოფიით შთაგონებული მიდგომით – ბუნებრივი მასალები, ნაკლებად დამუშავებული ზედაპირები და სიმშვიდის მატარებელი, უხეში სიმარტივე, რაც ქმნის ატმოსფეროს, რომელიც ერთდროულად შთამბეჭდავი და უკიდურესად მყუდროა.
აღსანიშნავია ის ფაქტი, რომ ინტერიერში არსებული კედლების ზედაპირები სრულად შესრულებულია დეკორატიული ლესვის ტექნიკით, რაც ორგანულ ტექსტურას მატებს სივრცეს და ამავდროულად ნათლად გამოხატავს ხელნაკეთი ზედაპირების სილამაზეს.
დეკორატიული ლესვა, რომელიც შედარებით ახალი მიმართულებაა ბაზარზე, საქართველოსა და უცხოეთშიც დიდი პოპულარობით სარგებლობს. ის ფუნქციონალური და ორნამენტული შემოქმედებითი ნამუშევარია, რომელიც განსხვავებულ მხატვრულ სახეს, სტილსა და მიმზიდველობას სძენს ინტერიერსა თუ ექსტერიერს. მისი მთავარი უპირატესობა იმაში მდგომარეობს, რომ ამ ტექნიკით სხვადასხვა ზედაპირის დამუშავებაა შესაძლებელი და გარეგნულ უპირატესობასთან ერთად, დეფექტებისა თუ დაზიანებების დასაფარად გამოიყენება.
იგივე მიდგომა ვრცელდება სამზარეულოზეც – ამ ზონაში განსაკუთრებულ ყურადღებას იქცევს ჩაშენებული სამზარეულოს ქვედა ზონა, რომელიც ასევე ლესვითაა დაფარული, რაც არღვევს სტანდარტულ სტერეოტიპს და ფუნქციურ ელემენტს დიზაინის ნაწილად აქცევს.
მისაღებ ოთახსა და მთავარ საძინებელში იატაკი მიკროცემენტით არის მოპირკეთებული – ეს ზედაპირი ვიზუალურად ჰარმონიულად ეხმიანება ლესვით გაფორმებულ კედლებს და ხაზს უსვამს ინტერიერის სიმშვიდეს. მიკროცემენტი არა მხოლოდ ესთეტიკურობის, არამედ გამძლეობის თვალსაზრისითაც იდეალურ გადაწყვეტას წარმოადგენს, განსაკუთრებით ისეთ სივრცეებში, სადაც ბუნებრივი განათება და ბუნებრივი ტექსტურები მთავარ აქცენტად გვევლინება.
თაკო კამკამიძის ინტერიერი დეტალებში იკითხება – ყოველ ნივთს, განათებასა თუ მცენარეს თავისი მიზანი და ადგილი აქვს სივრცეში. დიდი ფორმატის სარკეები, ქაღალდის სანათები, ბუნებრივი ქსოვილები, ხელნაკეთი ავეჯი და უამრავი სიმწვანე ქმნის ისეთ სახლს, რომელიც არა მხოლოდ ვიზუალურადაა დაბალანსებული, არამედ შინაგანად მშვიდიც. ეს არის გარემო, სადაც ფუნქცია და ფორმა სრულად ერწყმის ერთმანეთს და ქმნის ჰარმონიას, რომელიც ყოველდღიურ ცხოვრებას გაცნობიერებულ გამოცდილებად აქცევს.
