საგურამოში, ნავდარაანთკარში მდებარე 450 მ² ფართობის სახლის ინტერიერისა და ლანდშაფტის დიზაინზე არქიტექტურული და დიზაინ სტუდია A+A-ს დამფუძნებლება, ნინი ლაფაურმა და გიორგი შანშიაშვილმა იმუშავეს. პროექტის არქიტექტორი თორნიკე დადიანია.

საცხოვრებლის მთავარი კონცეფცია ბუნების ინტერიერში ინტეგრაციას ეფუძნება, რაც პანორამული შემინვით, ბუნებრივი ტექსტურებითა და მშვიდი ფერთა პალიტრით გამოიხატება.ავტორებმა დამკვეთს შესთავაზეს მიდგომა, რომლის მიხედვითაც გარემო ინტერიერის აღქმის მნიშვნელოვანი ნაწილი გახდებოდა. პანორამულმა ვიტრაჟებმა შიდა და გარე სივრცეების ვიზუალური გაერთიანების შესაძლებლობა შექმნა, ინტერიერში გამოყენებულმა ფერებმა და ფაქტურებმა კი ეს კავშირი კიდევ უფრო გამოკვეთა.
„დამკვეთს შევთავაზეთ ბუნების ინტერიერში ინტეგრაციის კონცეფცია. პანორამულმა ვიტრაჟებმა მოგვცა საშუალება, სივრცეები გაგვეერთიანებინა. ბუნებრივი ტექსტურები და მშვიდი ფერები ინტერიერში გამოვიყენეთ გარემოს მეტად ხაზგასასმელად“, — აღნიშნავენ პროექტის ავტორები.
სახლის ინტერიერის ჩამოყალიბებაში მნიშვნელოვანი როლი ბუნებრივ განათებას ენიჭება. დღის სინათლის სიუხვემ დიზაინერებს ღია, საშუალო და მუქი ტონების ერთ სივრცეში გამოყენების შესაძლებლობა მისცა. განსხვავებული ინტენსივობის მიუხედავად, ფერთა პალიტრა მთლიანად ბუნებრივ და ნეიტრალურ ტონებში რჩება, რაც ინტერიერის მშვიდ ხასიათს განაპირობებს.
განსაკუთრებული ყურადღება დაეთმო თეთრი ფერის გამოყენებას. მინიმალისტურ სივრცეში ავტორებისთვის მნიშვნელოვანი იყო, შეენარჩუნებინათ სიმსუბუქე და, ამავდროულად, თავიდან აერიდებინათ სიცივისა და ერთფეროვნების განცდა. თეთრი ტონების სხვა ფერებთან და ბუნებრივ ტექსტურებთან შეხამებით სივრცემ ჰაეროვნება შეიძინა, საერთო გარემო კი მყუდრო და კომფორტული დარჩა.
პროექტის ერთ-ერთი გამორჩეული ნაწილი აუზია, რომლის დაგეგმვა ავტორებისთვის საინტერესო ტექნიკურ გამოცდილებად იქცა. აუზიდან გადადენილი წყალი პირდაპირ წყალშემკრებ ღარში ჩადის. ამ კვანძის გადაწყვეტას დიზაინერები საკუთარ ექსპერიმენტად აღწერენ.
აუზის მოსაპირკეთებლად ნაცრისფერი მარმარილო შეირჩა. ავტორების განმარტებით, გამოყენებული ქვა ფორიანია და არ სრიალებს, წყალში ჩაძირული ნაწილი კი ფერს მნიშვნელოვნად არ იცვლის. ამ თვისების წყალობით, ქვის მოპირკეთება და წყლის ზედაპირი ვიზუალურად ერთიან კომპოზიციად აღიქმება.
ინტერიერთან ერთად პროექტის მნიშვნელოვანი ნაწილი ლანდშაფტის მოწყობა და მცენარეების შერჩევაც იყო. ბაღის განვითარება ეტაპობრივად გაგრძელდება — მას ახალი მცენარეები დაემატება და სეზონების ცვლილებასთან ერთად, განსხვავებული ფერები და განწყობა გამოიკვეთება.
ავტორები ინტერიერს სამი სიტყვით ახასიათებენ: მშვიდი, ფუნქციური და კომფორტული. სწორედ ამ თვისებებს ემსახურება პროექტის ძირითადი გადაწყვეტილებები — ბუნებრივი განათების გამოყენება, თავშეკავებული ფერთა პალიტრა და გარემოსთან მუდმივი ვიზუალური კავშირი.
ინტერიერის დიზაინი: სტუდიაA+A
ლანდშაფტის დიზაინი: სტუდიაA+A
არქიტექტურა: Dadiani Architects















































