სტუდია 4Visual-ის მიერ შექმნილი ინტერიერის დიზაინის პროექტი King David Residences-ში თანამედროვე ესთეტიკისა და გამორჩეული გემოვნების ერთგვარ მანიფესტს წარმოადგენს. ბინა ერთიან სივრცეში აერთიანებს დახვეწილ ფუნქციონალსა და ვიზუალურ ხელოვნებას, სადაც ყოველი დეტალი მკაფიოდ გამოხატავს ინტერიერის ავტორების ინტელექტუალურ მიდგომას დიზაინის მიმართ.
მისაღები და სამზარეულო ფართო ღია სივრცეშია განლაგებული და ერთმანეთთან ჰარმონიულადაა დაკავშირებული. ინტერიერის მთავარი აქცენტები მაღალი ხარისხის მასალებსა და დახვეწილ ფაქტურებზე კეთდება. სამზარეულოს კუნძული, თეთრი მარმარილოს საფარით, ქმნის ლაკონურ და ელეგანტურ ცენტრალურ ელემენტს, რომლის უკანა ფონზე ინტეგრირებული კარადები და თაროები წრფივად აგრძელებს სივრცის სისუფთავისა და სიმეტრიის ხაზს.
განათების სისტემები — სხვადასხვა ფორმისა და სიმაღლის სანათები — სივრცეს სიღრმესა და დინამიკას მატებს. მისაღებში დამაინტრიგებელია მდიდარი კედლის ფერები, თამამი ფორმის ავეჯი და ხელოვნების ნიმუშები, რაც ქმნის ბინადრის ინდივიდუალურ მახასიათებლებზე მორგებულ ატმოსფეროს.
პირველი საძინებელი სიმეტრიულად გადანაწილებული ელემენტების დახვეწილი კომბინაციაა. საწოლის უკან მოთავსებული მწვანე პანელი აქცენტად მუშაობს ღია ნაცრისფერ კედლებთან მიმართებაში. კედელზე ჩამოკიდებული ნამუშევარი — ორიგინალური ფერწერა ორი ფიგურით — ოთახს არტისტულ ხასიათს აძლევს. ინტეგრირებული კარადები ისეა გადაწყვეტილი, რომ ყურადღებას არ იპყრობს და მთლიანობაში, ოთახის არქიტექტურას ხაზს უსვამს.
მთავარი საძინებელი შედარებით უფრო დარბილებული ფერებით არის გადაწყვეტილი, სადაც კრემისფერი ტექსტილი, მსუბუქი კედლის განათება და სანათის სკულპტურული ფორმა ეხმიანება მოდერნისტულ ესთეტიკას. სივრცე წარმოდგენილია როგორც დასვენებისთვის განკუთვნილი ინტიმური გარემო — რბილი ტექსტურები, შუქის დიფუზიური განაწილება და სარკის ზედაპირის ფარული გამოყენება ოთახს სიმშვიდესა და ელეგანტურობას ანიჭებს.
აბაზანა მთავარი საძინებლისგან შუშის ტიხრითაა გამიჯნული და დიზაინში გამოყენებულია ორი განსხვავებული სტილისტური გადაწყვეტა. ერთი ნაწილი წარმოდგენილია როგორც თანამედროვე სპა-სივრცე — ცენტრალურად განლაგებული სკულპტურული აბაზანა, რომელსაც ფონად ემსახურება თეთრი კედლები ორნამენტული მოტივებითა და თბილი ხის ფაქტურები. მეორე ნაწილში, სადაც განთავსებულია სამრეცხაო ზონა და ორმაგი ნიჟარა, კედლები დაფარულია თეთრი ფილებით ნაცრისფერ-მწვანე ჩანართებით. ხის ავეჯი შავი ქვის ზედაპირით, აერთიანებს ფუნქციურობასა და ესთეტიკას. გამჭვირვალე მინის მიღმა მდებარე შხაპის კაბინა ზუსტად იმეორებს ბინის მთელ ფილოსოფიას — მარტივი ფორმები, მაღალი ხარისხი და დეტალების მიმართ უპირობო სიზუსტე.
სტუდია 4visual-ის მიერ შექმნილი ინტერიერი არა მხოლოდ ვიზუალურად მიმზიდველია, არამედ მკაფიოდ გამოხატავს პროექტის ავტორების ფუნდამენტურ ხედვას — როგორ უნდა გაერთიანდეს პრაქტიკულობა, თანამედროვე მასალა და ხელოვნების სიყვარული ერთ ჰარმონიულ საცხოვრებელ სივრცეში.
“იცხოვრე შენი ცხოვრებით” სათქმელად უფრო ადვილი, გასაბედად კი რთულია. ხშირად გაბედვა უნდა ერთი შეხედვით მარტივ საკითხებს, მაგალითად, სახლის საკუთარი გემოვნების მიხედვით მოწყობას. m2–ის კამპანია “გაბედე” სწორედ ამ საკითხზე გვაფიქრებს და კიდევ ერთხელ გვახსენებს, რომ ყველაფერი საინტერესო გაბედვით იწყება.
გაბედე, იცხოვრე შენი ცხოვრებით!
რუბრიკა „გაბედეს“ წარმდგენია m2
