ბაგებში მდებარე ბინა, სახელწოდებით OLIVE BLUSH, დიზაინ სტუდია Due-ს კიდევ ერთი პროექტია, რომელიც ნათლად გამოხატავს პროექტის ავტორების ფაქიზ ხედვას საცხოვრებელი სივრცის მიმართ. დამკვეთის სურვილი იყო, მიეღო სახლი, რომელიც იქნებოდა ჰაეროვანი, მსუბუქი და მყუდრო, სავსე მშვიდი ფერებით. სწორედ ამ სურვილზე დაყრდნობით შეიქმნა ინტერიერი, სადაც თითოეული ფაქტურა და დეტალი ერთმანეთთან ჰარმონიულად იკვეთება.
ბინის ფერთა პალიტრა ძირითადად აგებულია ზეთისხილის, ღია ვარდისფრის, ლიმნისფრისა და ნეიტრალურ ტონებზე. ეს კომბინაცია ქმნის გარემოს, რომელიც არასდროსაა დამღლელი და არც ვიზუალურად მოსაბეზრებელი — პირიქით, გამშვიდებს და სიმყუდროვეს მატებს ყოველდღიურ ცხოვრებას. ავეჯი რბილი და კომფორტულია, რაც კიდევ უფრო ამძაფრებს მყუდრო ატმოსფეროს, ხოლო განათება თბილი და ფაქიზია, ეს კი, თავის მხრივ, ინტერიერს დამატებით სიმშვიდეს სძენს.
მნიშვნელოვან როლს თამაშობს დეტალები: მაგალითად, ავეჯში ჩაშენებული მართვადი დეკორატიული ბუხარი, რომელიც ნამდვილი ცეცხლის ილუზიას ქმნის და სახლში სასიამოვნო აურა შემოაქვს.
ასევე საინტერესოა ერთი ფერის რამდენიმე ტონალობით შექმნილი კომპოზიციები — ეს მიდგომა ინტერიერს მთლიანობას აძლევს და პროექტის ავტორებს ერთფეროვნების თავიდან არიდებაში ეხმარება.
OLIVE BLUSH არის სივრცე, სადაც სუფთა ფერები, რბილი ტექსტურები და ფაქიზი განათება ერთიანდება და ქმნის სახლს, რომელიც არამხოლოდ ვიზუალურად ლამაზია, არამედ შეგრძნების დონეზე მშვიდი და სასიამოვნო.
პროექტის ავტორები: ლიკა ლასარეიშვილი და ცოტნე ანდრიაძე
ინტერიერის დიზაინის სტუდია: „Due“
