ვაკეში მდებარე 160 მ² ბინის ინტერიერის დიზაინი ნინო გორგილაძემ შექმნა მკაცრად განსაზღვრული მოთხოვნების გათვალისწინებით. დამკვეთის ძირითადი სურვილი იყო მინიმალისტური ესთეტიკა: ინტერიერში არ უნდა გამოყენებულიყო ოქროსფერი მეტალი, და ფარდები, ხოლო კედლები უნდა ყოფილიყო ნაცრისფერ ტონში. ამავდროულად, პრიორიტეტად რჩებოდა ყავისფერი გამა.
პროექტის ავტორმა კონცეფცია სწორედ ამ პარამეტრების გათვალისწინებით დაგეგმა. სიმყუდროვისა და სითბოს შესაქმნელად გამოყენებულ იქნა ყავისფერი დეტალები ავეჯის, ქვის ტექსტურებისა და სამზარეულოს ფასადების სახით. ცივი ფერების დასაბალანსებლად ინტერიერში დამატდა ე.წ. ზეთისხილის მწვანე ტონის მქონე რბილი ავეჯი და სკამები. ხოლო დეკორატიული ელემენტის სახით, კედლებზე მინიმალური ფორმის მოლდინგებია გამოყენებული.
როგორც პროექტის ავტორი გვიამბობს, ობიექტზე ერთ-ერთი მთავარი ტექნიკური გამოწვევა იყო HVAC სისტემის ინტეგრაცია, რის გამოც რამდენიმე სივრცეში ჭერის სიმაღლის დაპატარავება გახდა საჭირო. ვიზუალური დაბალანსებისთვის გამოყენებულ იქნა დიდი სარკე და ხაზოვანი განათება პერიმეტრზე. ამ გადაწყვეტამ ასევე ხელი შეუწყო სასადილო ზონის ვიზუალურად გამოკვეთას საერთო სივრცეში.
სასადილო ზონასთან არსებული ტერასა ბუნებრივი განათების მთავარი წყაროა, თუმცა მეზობელი შენობის სიახლოვემ საჭირო გახადა სივრცის ვიზუალური დაცვა, რაც ბამბუკის ლერწამით განხორციელდა. ხის ფაქტურამ ინტერიერს დამატებითი სითბო შემატა.
ბინაში ორი მთავარი საძინებელი გვხვდება. მოზარდის საძინებელში დიზაინერმა შეარჩია დაბალანსებული გადაწყვეტა: შავი მქრქალი და ღია ხის ტონალობის კერამოგრანიტი სველ წერტილში, ხოლო თეთრი-მონაცრისფრო აგური და ღია ხის ელემენტები — საძინებელში.
მეორე საძინებელი თანამედროვე კლასიკურ სტილშია გადაწყვეტილი, ხოლო ამავე სივრცისთვის განკუთვნილ აბაზანაში ყავისფერი ტონის საინტერესო აქცენტი გვხვდება.
ამას გარდა, მოეწყო დამოუკიდებელი სტუმრის სველი წერტილი, რომელშიც დიზაინერმა საინტერესო ექსპერიმენტის განხორციელება შეძლო — ნინო გორგილაძემ ამ სივრცეში წითელი კედელი და ასიმეტრიული სარკე გამოიყენა, რაც დანარჩენ ინტერიერთან კონტრასტში მოდის და საკმაოდ დიდ შთაბეჭდილებას ახდენს.
ნინო გორგილაძის პროექტი ხაზგასმით აჩვენებს, თუ როგორ შეიძლება მკაცრი ვიზუალური და ფუნქციური შეზღუდვების პირობებში შეიქმნას ჰარმონიული, თბილი და ამავდროულად ვიზუალურად ეფექტური საცხოვრებელი გარემო.
