არქიტექტორი და ინტერიერის დიზაინერი ნინო მშველიძე უკვე ორი ათეული წელია ქმნის სივრცეებს, რომლებიც აერთიანებს ესთეტიკას, ფუნქციურობასა და ემოციურ შთაბეჭდილებას. საკუთარი სტუდიის, Structura.nyc-ს, დაარსება მისთვის ბუნებრივი ნაბიჯი აღმოჩნდა — შესაძლებლობა, თავისუფლად გამოხატოს საკუთარი ხედვა და ინოვაციური მიდგომით მიანიჭოს სიცოცხლე სხვადასხვა კულტურულ კონტექსტში განლაგებულ სივრცეებს. კარიერა, რომელიც საქართველოდან დაიწყო და ახლა ნიუ-იორკში ვითარდება, ნათლად ასახავს მის პროფესიულ განვითარებასა და ინტერნაციონალურ გავლენას. ამ ინტერვიუში ნინო გვიზიარებს პროფესიული გზის მნიშვნელოვან ეტაპებს, Structura.nyc-ს ფესვებსა და ხედვას, და იმას, თუ როგორ შეუძლია დიზაინს, აწარმოოს კულტურათა დიალოგი.
ნინო, გვიამბეთ თქვენი ახალი კომპანიის შესახებ, როდის გაგიჩნდათ „Structura.nyc“-ს შექმნის იდეა და რატომ ეს სახელი?
„Structura.nyc“-ს შექმნის იდეა რამდენიმე წლის წინ დამებადა. 20 წლიანი გამოცდილების შემდეგ მივხვდი, რომ მსურდა შემექმნა ისეთი სივრცეები, რომლებიც არქიტექტურისა და დიზაინის სინთეზს წარმოადგენდა და მომინდა საკუთარი დიზაინ სტუდიის შექმნა ჩემთვის ახალ ადგილას – ნიუ-იორკში. სახელი „Structura“ ლათინური სიტყვაა და სტრუქტურას ნიშნავს, რაც ჩემთვის მყარი საფუძვლებისა და ინოვაციური მიდგომების შერწყმის სიმბოლოა დიზაინში. კომპანიის სახელზე და ლოგოზე იმუშავეს პროფესიონალებმა – სოფო როსტომაშვილმა და ელდარ ხალიბაურმა .
როგორია „Structura.nyc“-ს პროფილი და რა ტიპის მომსახურებას მოიცავს ის?
„Structura.nyc“ არის დიზაინ სტუდია, რომელიც სპეციალიზდება არქიტექტურასა და ინტერიერის დიზაინზე. ჩვენ მომხმარებელს ვთავაზობთ სრულ სერვისებს (დაწყებული კონცეფციის შექმნიდან, პროექტირების, მასალების შერჩევისა და მშენებლობის მართვის ჩათვლით), რათა უზრუნველვყოთ ყოველი პროექტის წარმატებული განხორციელება.
რა ტიპის სეგმენტზეა გათვლილი „Structura.nyc“-ს მომსახურება?
ჩვენი მომხმარებლები არიან როგორც კერძო პირები, ასევე კომერციული ორგანიზაციები, რომლებიც ეძებენ უნიკალურ და ფუნქციურ დიზაინ გადაწყვეტილებებს. „Structura.nyc“-ს სერვისები გათვლილია მათზე, ვინც აფასებს ხარისხს, ინოვაციას და ინდივიდუალურ მიდგომას.
როგორც ვიცით, თქვენ ნიუ-იორკსა და საქართველოში მოღვაწეობთ, ამ მხრივ როგორი იქნება კომპანიის სამუშაო სივრცე? გეგმავთ ქართულ-ამერიკული ბაზრის ათვისებას?
დიახ, ჩემი საქმიანობა მოიცავს როგორც ნიუ-იორკს, ასევე საქართველოს. „Structura.nyc“-ს მიზანია ორივე ბაზარზე აქტიური ყოფნა და უნიკალური პროექტების შექმნა კულტურათა სინთეზით, რაც თავის მხრივ, ხელს შეუწყობს ქართულ-ამერიკული თანამშრომლობის გაღრმავებას დიზაინის სფეროში.
საინტერესოა, როგორ მოხვდით აშშ-ში? გვიამბეთ უფრო დეტალურად თქვენი ამერიკული ცხოვრებისა და კარიერის შესახებ. როგორ დაიწყო ყველაფერი და რამდენად რთული იყო აქ თავის დამკვიდრება?
ამერიკაში ჩამოსვლა ჩემთვის ახალი გამოწვევა იყო. თავდაპირველად ვიმუშავე სხვადასხვა დიზაინ კომპანიაში, რაც დამეხმარა ადგილობრივი ბაზრის და პროფესიული სტანდარტების გაცნობაში. პირველ ეტაპზე იყო სირთულეები, მაგრამ ჩემი ვნება და მიზანდასახულობა დამეხმარა პროფესიულ ზრდაში და საკუთარი კომპანიის შექმნაში.
ნიუ იორკი თვითონ არის შთაგონების წყარო — ამ ქალაქში იმდენი საინტერესო რამ არის ერთმანეთში შეზავებული, რომ იდეების ნაკლებობას არასდროს განიცდი. თუმცა, არის 5 ძირითადი რამ, საიდანაც ნიუ-იორკის ინტერიერის პროექტებზე მუშაობისას ვიღებ შთაგონებას:
- არქიტექტურული მრავალფეროვნება —შეგიძლია ერთ უბანში ნახო სხვადასხვა სტილის შენობა, ინდუსტრიული ლოფტი და თანამედროვე მინიმალისტური შენობა. ვცდილობ, ეს კომბინაცია ინტერიერებშიც ავსახო ძველი და ახალი ელემენტების შერწყმით.
- ქუჩის სტილი და კულტურა — სოჰო, ბრუკლინი, ჰარლემი… ყველა უბანს თავისი „ხასიათი“ აქვს. მაგალითად, Williamsburg-ის ბოჰემური ენერგია ხშირად მიბიძგებს ინტერიერში თავისუფალი სტრუქტურებისა და მიწისფერი ტონების გამოყენებისკენ.
- მუზეუმები და გალერეები — MoMA, The Met, Guggenheim — როცა თვალში გხვდება ხელოვნების სხვადასხვა ეპოქა, გიჩნდება იდეა, როგორ შეიძლება, მაგალითად, ბაუჰაუსი თანამედროვე სამზარეულოს დიზაინში გადმოიტანო.
- შუქი — ნიუ-იორკის ურბანული განათება, დღის და ღამის სინათლის თამაშები, უზარმაზარი ფანჯრებიდან შემოსული ბუნებრივი შუქი — ეს ყველაფერი შთაგონებას მაძლევს სივრცის დაგეგმარებაში.
- ეკო-მეგობრული დიზაინი – ქალაქში მზარდია ინტერესი ეკო-მეგობრული დიზაინისადმი. ხშირად მაწვდის შთაგონებას ურბანული ბაღები, ადგილობრივი არქიტექტორების პროექტები, რომლებსაც სიმწვანე ინტერიერში შემოაქვთ.
როგორია თქვენი დიზაინ ფილოსოფია?
ვისაუბროთ თქვენს შემოქმედებაზე. რომელ განხორციელებულ პროექტებს გამოარჩევდით და რატომ?
ჩემი საქმიანობა მოიცავს სხვადასხვა ქვეყნებში განხორციელებულ ნამუშევრებს, თუმცა ამ მხრივ გამოვყოფდი რესტორანი „უბანის“ პროექტს ნიუ-იორკში, რომელიც აერთიანებს ქართულ ტრადიციულ ელემენტებს თანამედროვე დიზაინთან. ამ პროექტზე მუშაობისას შევკრიბე პროფესიონალების გუნდი, რომელთანაც შევძელი ჩემი ხედვის რეალიზება არქიტექტურასა და დიზაინში. “უბანი” არის სივრცე, სადაც სტუმრებს აქვთ საშუალება, მიიღონ სიამოვნება უნიკალურ და მყუდრო ატმოსფეროში.
როგორი ტიპის პროექტებზე აპირებთ მუშაობას და რას უკავშირდება თქვენი უახლოესი გეგმები კომპანიასთან დაკავშირებით?
მომავალში ვგეგმავ სხვადასხვა ტიპის პროექტებზე მუშაობას, მათ შორის რესტორნებზე ბერლინში და ნიუ-იორკში. „Structura.nyc“-ს მიზანია, შექმნას ინოვაციური და კულტურულად მდიდარი სივრცეები, რომლებიც პასუხობს თანამედროვე დიზაინის ტენდენციებს და ამართლებს მომხმარებელთა მოლოდინებს.
