ბერლინის შუაგულში, სადაც ქალაქის ენერგია და მრავალფეროვნება მუდმივად იკვეთება, დიზაინ სტუდია Due-მ განახორციელა თავისი მეორე საერთაშორისო პროექტი — სწრაფი კვების ობიექტი, რომელიც ქართულ სამზარეულოს თანამედროვე სტილში წარმოაჩენს. კონცეფცია თავიდანვე ნათელი იყო: სივრცე უნდა ყოფილიყო სავსე ხასიათითა და სიურპრიზებით, ადგილი, რომელიც ისტორიას ჰყვება — ოდნავ მხიარულს, ოდნავ უჩვეულოს და თან ყოველ ვიზიტზე ახალ დეტალებს აღმოგაჩენინებს.
ინტერიერში უხეში ბეტონი და მეტალი ბერლინის ურბანულ ხასიათს გამოხატავს, თუმცა ეს სიმკვრივე გაწონასწორებულია თბილი ტერაკოტას ფილებით, მზისფერი კედლებითა და თამამი დიზაინერული გადაწყვეტილებებით, რომლებიც სივრცეს სიცოცხლით ავსებს. ავეჯი მასიური და გეომეტრიულია — მოზაიკური მაგიდები და დაბალი სკამები ქმნის მარტივ, ყოველდღიურ და ერთდროულად მყუდრო გარემოს.
ჭერზე ყურადღებას იქცევს სანათის ინსტალაცია, რომელიც მბზინავი ხაზივით ეხვევა სივრცეს, ქუჩიდან პირდაპირ შენობაში შემოჰყავს სტუმარი და უძღვება მას საკვებ ზონამდე. კედლები აქ სიტყვასიტყვით „ლაპარაკობენ“ — თამამი მურალები, ქართული რეტრო მოტივები, მხიარული პერსონაჟები და ე.წ. “ქუჩის ხელოვნებით” შთაგონებული ილუსტრაციები ენერგიას მატებს ინტერიერს და მას ოდნავ ქაოტურს, მაგრამ ამასთანავე საინტერესოს ხდის.
ნეონის აბრები ფერად ელვარებას ქმნის და იუმორით გაჟღენთილი ფრაზებით (მაგალითად „Calories don’t count here“), ყველას ახსენებს, რომ ეს არის ადგილი მცირე „დანაშაულებრივი სიამოვნებებისთვის“ და კარგი განწყობისთვის.
აღსანიშნავია, რომ პროექტში მონაწილეობა მიიღო ქართველმა მხატვარმა მუსია ქებურიამ, რომელმაც დიზაინ სტუდიის ხედვა სრულად განასახიერა და თავისი ფერადი მურალებით სივრცე მრავალშრიან და ჯადოსნურ ატმოსფეროდ აქცია.
ეს არის ადგილი, რომელიც ცოცხლობს — გამხიარულებს, გიზიდავს და გიქმნის სურვილს, კიდევ ერთხელ დაბრუნდე.
პროექტის ავტორები: ლიკა ლასარეიშვილი და ცოტნე ანდრიაძე
ინტერიერის დიზაინის სტუდია: „Due“
