გლობალური დიზაინისა და არქიტექტურის ინდუსტრია იმდენად სწრაფად ვითარდება, რომ წელიწადის განმავლობაში მსოფლიოს სხვადასხვა წერტილში ასობით გამოფენა, ბიენალე და ფესტივალი იმართება. თუმცა, პროფესიონალებისთვის ასეთი მასშტაბური შეკრებები მხოლოდ ახალი კოლექციების ნახვას არ ნიშნავს — ეს არის ადგილი, სადაც იბადება მომავალი ტენდენციები, ფორმირდება მდგრადი და ინოვაციური ხედვები, მყარდება საერთაშორისო კავშირები და იქმნება კოლაბორაციები, რომლებიც ინდუსტრიის მომავალს განსაზღვრავს.
საერთაშორისო კალენდარი ღონისძიებებით მუდმივად გადატვირთულია, თუმცა მათ შორის არსებობს რამდენიმე უმთავრესი ორიენტირი, რომელთა გამოტოვებაც სფეროს წარმომადგენლებისთვის თითქმის წარმოუდგენელია. გთავაზობთ Homeis-ის რჩეულ 5 ღონისძიებას, რომელთა გათვალისწინებაც თქვენი 2027 წლის გეგმის შედგენისას ნამდვილად ღირს.
1. Salone del Mobile.Milano და Fuorisalone — მილანი, იტალია

როდის: 13–18 აპრილი, 2027
აპრილში მილანში ვიზიტი დიზაინის ორ განსხვავებულ გამოცდილებას აერთიანებს. Fiera Milano Rho-ს საგამოფენო კომპლექსში Salone del Mobile იმართება, ქალაქის სხვადასხვა სივრცეში კი Fuorisalone-ს გამოფენები, ინსტალაციები და პრეზენტაციები მიმდინარეობს.
Salone განსაკუთრებით საინტერესოა მათთვის, ვინც ავეჯისა და ინტერიერის სფეროში მუშაობს: აქ ახალი კოლექციების დათვალიერებას მწარმოებლებთან შეხვედრასა და პროფესიული კავშირების დამყარებას შეუთავსებთ. ქალაქის პროგრამა კი საშუალებას გაძლევთ, დიზაინი გალერეებში, შოურუმებსა და დროებით გახსნილ სივრცეებში აღმოაჩინოთ.
2027 წელს Salone-ს დაემატება Salone Contract, რომელიც ფართომასშტაბიანი პროექტების მიმართულებას დაეთმობა. ამას გარდა, წელს მეორედ გაიმართება Salone Raritas — საკოლექციო დიზაინის, უნიკალური ობიექტებისა და შეზღუდული ტირაჟის ნამუშევრების პლატფორმა.
ვისთვისაა: ინტერიერის დიზაინერებისთვის, არქიტექტორებისთვის, მწარმოებლებისთვის და მათთვის, ვისაც ახალი კოლექციებისა და ბრენდების აღმოჩენა სურს.
2. ვენეციის არქიტექტურის ბიენალე — ვენეცია, იტალია

როდის: 8 მაისი – 21 ნოემბერი, 2027.
განსხვავებით კომერციული ექსპოზიციებისგან, ვენეციის ბიენალე არის მსოფლიოს უმთავრესი ინტელექტუალური პლატფორმა, სადაც არქიტექტურა განიხილება როგორც სოციალური, ეკოლოგიური და პოლიტიკური პასუხი გლობალურ გამოწვევებზე. ეროვნული პავილიონები და საერთაშორისო კურატორის პროექტი გვთავაზობს მომავლის ქალაქების, საცხოვრებელი სივრცეებისა და კლიმატური ადაპტაციის ყველაზე გაბედულ ხედვებს.
მე-20 საერთაშორისო არქიტექტურულ გამოფენას ვანგ შუ და ლუ ვენიუ, Amateur Architecture Studio-ს თანადამფუძნებლები, კურატორობენ. მათი პრაქტიკისთვის მნიშვნელოვანია ადგილობრივი კონტექსტი, ტრადიციული სამშენებლო ცოდნა და მასალებთან მუშაობა.
ბიენალეს ძირითადი სივრცეები Giardini და Arsenale იქნება. საერთაშორისო გამოფენასთან ერთად, ეროვნული პავილიონები სხვადასხვა ქვეყნის არქიტექტურულ საკითხებსა და ხედვებს წარმოაჩენს.
ვისთვისაა: არქიტექტორებისთვის, სტუდენტებისთვის, მკვლევრებისთვის და ყველასთვის, ვისაც შენობებთან ერთად მათი შექმნის სოციალური და კულტურული გარემოც აინტერესებს.
3. NYCxDESIGN – ნიუ-იორკი, აშშ

როდის: 13–20 მაისი, 2027.
ნიუ-იორკის ოფიციალური დიზაინის კვირეული ქალაქის სხვადასხვა ნაწილში მიმდინარე გამოფენებს, საუბრებს, ტურებსა და პრეზენტაციებს აერთიანებს. პროგრამა დიზაინის მრავალ მიმართულებას მოიცავს — ინტერიერისა და პროდუქტის დიზაინიდან საჯარო სივრცემდე და ტექნოლოგიებამდე.
NYCxDESIGN საინტერესო შესაძლებლობაა ამერიკული დიზაინის სცენის გასაცნობად: შეგიძლიათ მოინახულოთ შოურუმები, აღმოაჩინოთ დამოუკიდებელი ავტორები და დაესწროთ პროფესიულ შეხვედრებს.
ვისთვისაა: დიზაინერებისთვის, არქიტექტორებისთვის, ბრენდებისთვის და ამერიკული ბაზრით დაინტერესებული პროფესიონალებისთვის.
4. 3daysofdesign — კოპენჰაგენი, დანია

როდის: 9–11 ივნისი, 2027.
სამი დღის განმავლობაში კოპენჰაგენის შოურუმები, გალერეები და სხვა სივრცეები დიზაინის ფესტივალის მონაწილეებს მასპინძლობს. პროგრამაში ერთმანეთს ხვდება ავეჯი, განათება, ტექსტილი და ხელნაკეთი ნივთები — როგორც დანიური, ისე საერთაშორისო ბრენდებისა და ავტორების ნამუშევრებით.
3daysofdesign-ის ხიბლი უშუალო შეხვედრებშია: ობიექტების დათვალიერებას ხშირად მათი შემქმნელების გაცნობაც ახლავს თან. ქალაქში გადაადგილება კი საშუალებას გაძლევთ, ფესტივალს კოპენჰაგენის არქიტექტურისა და საჯარო სივრცეების გაცნობა შეუთავსოთ.
ვისთვისაა: ინტერიერის დიზაინერებისთვის, არქიტექტორებისთვის და ყველასთვის, ვისაც თანამედროვე ავეჯი, მასალები და წარმოების პროცესი აინტერესებს.
5. London Design Festival — ლონდონი, დიდი ბრიტანეთი

როდის: 18–26 სექტემბერი, 2027.
London Design Festival 2027 წელს საიუბილეო, 25-ე გამოცემას გამართავს. ფესტივალი ქალაქის სხვადასხვა უბანსა და კულტურულ სივრცეს აერთიანებს და ლონდონის დიზაინის სცენის მრავალფეროვნებას წარმოაჩენს.
ეს კარგი არჩევანია მათთვის, ვისაც ერთ ვიზიტში განსხვავებული ფორმატების ნახვა სურს: მასშტაბური ინსტალაციები, დამოუკიდებელი სტუდიების პროექტები, გამოფენები და პროდუქტის პრეზენტაციები.
ვისთვისაა: არქიტექტორებისთვის, დიზაინერებისთვის, მკვლევრებისთვის და ყველასთვის, ვისაც ბრიტანული და საერთაშორისო კრეატიული ინდუსტრიის თანამედროვე ტენდენციები აინტერესებს.







