”მე მჯერა, რომ საუკეთესო არქიტექტურა მოდის ყველა იმ ელემენტის სინთეზიდან, რომელიც მოიცავს შენობას – სტრუქტურა, რომელიც მას ინარჩუნებს; მომსახურება, რომელიც საშუალებას აძლევს, იმუშაოს; შენობის ეკოლოგია – არის თუ არა იგი ბუნებრივად ვენტილირებადი, შეგიძლიათ თუ არა ფანჯრების გაღება, ასევე სინათლის ხარისხი; გამოყენებული მასალები, მათი მასა ან სიმსუბუქე; სივრცეების ხასიათი; ფორმის სიმბოლიზმი; შენობის დამოკიდებულება ჰორიზონტთან ან ქუჩის ლანდშაფტთან; და ხერხი, რომლითაც შენობა თავის არსებობას ამტკიცებს ქალაქსა თუ სოფელში. წარმატებული არქიტექტურა ეხება ამ ყველაფერს და ბევრ სხვას,” – ასე ფიქრობს ნორმან ფოსტერი, ცნობილი არქიტექტორი და არქიტექტურული სტუდიის, Foster and Partners-ის დამფუძნებელი.
მის შემოქმედებას არარეალურიც კი შეგვიძლია ვუწოდოთ. ფოსტერის არქიტექტურა ცდება ყველანაირ საზღვარს. ფორმები, რომლებსაც ამ ადამიანის შემოქმედებაში ვხვდებით, არ ფიგურირებს სხვების ნამუშევრებში – მათი იდენტობა ცხადზე ცხადია და ალბათ სწორედ ეს აქცევს ფოსტერს გამორჩეულ არქიტექტორად.
ნორმან ფოსტერი დაიბადა მანჩესტერში 1935 წელს. მისი მამა იყო მანქანათმცოდნე, რამაც გავლენა მოახდინა მასზე, დაუფლებოდა ინჟინერიას, დიზაინს და შეექმნა შენობების დიზაინი. მანჩესტერის უნივერსიტეტის არქიტექტურისა და ქალაქის დაგეგმარების სკოლის დამთავრების შემდეგ, 1961 წელს მან მიიღო ჰენრის სტიპენდია იელის უნივერსიტეტში, სადაც აიღო მაგისტრის ხარისხი არქიტექტურაში.
როგორც უკვე ვახსენეთ, ის არის ფოსტერისა და პარტნიორების დამფუძნებელი და თავმჯდომარე. კომპანია 1967 წელს დაარსდა ლონდონში და მან დროთა განმავლობაში სხვადასხვა ქვეყანა მოიცვა – ახლა უკვე კომპანიას ოფისები ოცზე მეტ ქვეყანაში აქვს. ბოლო ოთხი ათწლეულის განმავლობაში ფოსტერის კომპანია იყო პასუხისმგებელი სამუშაოების საოცრად ფართო სპექტრზე, დაწყებული ურბანული გენერალური გეგმებიდან, საზოგადოებრივი ინფრასტრუქტურიდან, აეროპორტებიდან, სამოქალაქო და კულტურული შენობებიდან, ოფისებიდან და სამუშაო ადგილებიდან კერძო სახლებამდე და პროდუქტის დიზაინამდე.
ფოსტერის პირველი შენობები, რომლებმაც მიიღეს საერთაშორისო აღიარება, იყო სენზბერის ვიზუალური ხელოვნების ცენტრი (1974–78), ნორვიჩში, ინგლისში; ჰონკონგისა და შანხაის საბანკო კორპორაციის შტაბი (1979– 86) ჰონგ კონგში, ფუტურისტული ფოლადისა და შუშის საოფისე შენობა საფეხურიანი პროფილით. ამ კომისიებში მან თავი დაიმკვიდრა, როგორც ერთ-ერთი მსოფლიო ლიდერი მაღალტექნოლოგიურ დიზაინში: მაგალითად, ამ უკანასკნელი შენობისთვის მან ლიფტები შენობის ექსტერიერში გადაიტანა, სადაც მათი ადვილად მოვლა იყო შესაძლებელი. ამგვარად შეიქმნა ღია გეგმები სივრცეების ცენტრში. ფოსტერმა შექმნა უფრო მჭიდრო ურთიერთობა შიდა და გარე სივრცეებს შორის და სცადა ადამიანი უკიდურესად ფუტურისტულ საოფისე გარემოში შეეყვანა.
1981 წელს ფოსტერმა დაიწყო მუშაობა ლონდონის სტენსტედის აეროპორტში ახალი ტერმინალის შენობაზე. Foster + Partners-ის მიერ შექმნილი შენობა, რომელიც აღიარებულია, როგორც მაღალტექნოლოგიური არქიტექტურის ძეგლი, გაიხსნა 1991 წელს და მიენიჭა 1990 წლის ევროკავშირის პრიზი თანამედროვე არქიტექტურისთვის / Mies van der Rohe Award.
ფოსტერმა ასევე დაამკვიდრა საერთაშორისო რეპუტაცია ისეთი მრავალფეროვანი პროექტებით, როგორიცაა ახალი გერმანიის პარლამენტი რაიხსტაგში ბერლინში, ჩეკ ლაპ კოკის საერთაშორისო აეროპორტი, კომერცბანკის შტაბი ფრანკფურტში, ვილის ფაბერი და დიუმას სათავო ოფისი იპსვიჩში. დაარსების დღიდან კომპანიამ მიიღო 400 -ზე მეტი ჯილდო, მოიგო მრავალი საერთაშორისო და ეროვნული კონკურსი.
ნორმან ფოსტერი 1999 წელს გახდა პრიცკერის არქიტექტურის პრიზის 21-ე ლაურეატი. მას მიენიჭა არქიტექტორთა ამერიკული ინსტიტუტის ოქროს მედალი არქიტექტურაში (1994), სამეფო ოქროს მედალი არქიტექტურისთვის (1983) და საფრანგეთის არქიტექტურის აკადემიის ოქროს მედალი (1991 წ.). 1990 წელს მას მიენიჭა რაინდის წოდება დედოფლის დაბადების დღეზე, ხოლო 1999 წელს მიენიჭა პერის წოდება და გახდა The Lord Foster of Thames Bank.
ფოსტერი კითხულობდა ლექციებს მთელ მსოფლიოში და ასწავლიდა არქიტექტურას გაერთიანებულ სამეფოსა და შეერთებულ შტატებში. ის იყო ლონდონის არქიტექტურული ასოციაციის ვიცე-პრეზიდენტი, ხელოვნების სამეფო კოლეჯის საბჭოს წევრი და ლონდონის არქიტექტურის ფონდის დამფუძნებელი.
