Of a home studio-ს ახალი პროექტი თავიდანვე ჩაფიქრებული იყო არა როგორც სტანდარტული სამუშაო სივრცე, არამედ როგორც გარემო, რომელიც თავად კომპანიის ხასიათს — კრეატიულობას, ენერგიასა და მუდმივ მოძრაობას — გამოხატავს. აქ ინტერიერი არ ცდილობს იყოს ფორმალური ან მკაცრი; პირიქით, ის ქმნის თავისუფალ, ნათელ და ფერად ატმოსფეროს, სადაც ყოველდღიური სამუშაო პროცესიც შემოქმედებით გამოცდილებად გარდაიქმნება. პროექტის მთავარი იდეა იყო ისეთი სივრცის შექმნა, რომელიც ერთდროულად ინარჩუნებს პროფესიულ ორგანიზებულობას და ამავე დროს თანამშრომლებს სთავაზობს კომფორტულ, შთამაგონებელ გარემოს, სადაც დეტალები, მასალები და ფერადი აქცენტები საერთო კონცეფციის ნაწილად ერთიანდება.
პროექტის ავტორების თანახმად, დამკვეთის მთავარი მოთხოვნა იყო, რომ მათი სამუშაო გარემო არ ყოფილიყო სტანდარტული, ცივი საოფისე ინტერიერი, რადგან მათი საქმიანობის სპეციფიკიდან გამომდინარე, სურვილი ჰქონდათ, სივრცე ყოფილიყო ნათელი, ფერადი და განსხვავებული, სადაც მუშაობა არა მხოლოდ პროდუქტიული, არამედ სასიამოვნო და შთამაგონებელი იქნებოდა თანამშრომლებისთვის.
“დიზაინის შექმნისას მაქსიმალურად ვეცადეთ, დაგვეკავშირებინა კომპანიის კრეატიული ხასიათი ინტერიერის საერთო კონცეფციასთან და შეგვექმნა გარემო, სადაც ყოველი დეტალი ინდივიდუალურ და გამორჩეულ ხასიათს შეინარჩუნებდა,” – სოფო წივილაძე და თეო გობეჯიშვილი
სამუშაო სივრცეები გადაწყვეტილია თბილ ტონებში, თუმცა ისე, რომ არ დაიკარგოს ოფისისთვის დამახასიათებელი ორგანიზებული და პროფესიული ატმოსფერო.
ოფისი დაყოფილია სამ ძირითად ნაწილად: სამუშაო, შეხვედრებისა და დასვენების სივრცეებად. ისინი გამიჯნულია, თუმცა ნაწილობრივ დაკავშირებულია სართულების დონეების ცვლილებითა და გამჭვირვალე ტიხრებით, რაც ქმნის ღია, მეგობრულ გარემოს და უზრუნველყოფს ბუნებრივი სინათლის თავისუფალ გავრცელებას. ეს გადაწყვეტა არა მხოლოდ ვიზუალურად გამოყოფს ფუნქციურ ზონებს, არამედ ხელს უწყობს თანამშრომლების კომუნიკაციასა და მოძრაობას სივრცეში.
პირველ სართულზე განთავსებულია საერთო გამოყენების სივრცეები. შეხვედრების ოთახი სამზარეულოს ნაწილიდან გამოიყოფა მოძრავი შუშის კარით, რაც საშუალებას აძლევს სივრცეს, იყოს მოქნილად გამოყენებული სხვადასხვა საჭიროებისთვის. ამ ზონაში ინტერიერის დომინანტი დეტალი არის წითელი შეხვედრების მაგიდა, რომელიც ფერის ერთ-ერთ მთავარ ელემენტად იკითხება.
მეორე და მესამე სართულებზე მდებარეობს ინდივიდუალური სამუშაო ადგილები. თითოეული მათგანი გამოყოფილია ვარდისფერი მინა-ბლოკით, რომელიც ბუნებრივ სინათლეს ატარებს და ოფისში ერთდროულად უზრუნველყოფს პრივატულობასა და სიმყუდროვეს. დერეფნებში კი მინა-ბლოკის კედლები ვიზუალურად ყოფს ზონებს და უზრუნველყოფს სინათლის თავისუფალ გავრცელებას.
კიბის კონსტრუქცია მთლიანად მეტალითაა დაფარული, რაც ინტერიერს მსუბუქ, ინდუსტრიულ ელფერს აძლევს.
საერთო ჯამში, Of a home studio-ს პროექტი აერთიანებს ფუნქციურ გადაწყვეტილებებს, მოქნილ დაგეგმარებასა და მასალებს, სადაც გამჭვირვალე ტიხრები, ფერის აქცენტები და ბუნებრივი სინათლე ქმნის გარემოს, რომელიც თანამშრომლებისთვის შთამაგონებელი, კომფორტული და პროდუქტიული სამუშაო სივრცეა.
პროექტის ავტორები: სოფო წივილაძე, თეო გობეჯიშვილი
დიზაინ სტუდია: Of a home studio
