მოდის დიზაინერის, პაბლო ეროსის მადრიდული ბინა ცხოვრებისეული დრამატურგიის შესანიშნავი სცენარია. ეს არ არის მხოლოდ საცხოვრებელი სივრცე – ეს არის ვიზუალური და ემოციური ნარატივი, რომელიც იმ ადამიანზე გვიყვება, ვინც აქ ცხოვრობს. ინტერიერი გაჯერებულია საკოლექციო ნივთებით, დიზაინ ელემენტებით და კულტურული მინიშნებებით, თუმცა ამ სიმდიდრის მიღმა სუფევს სიფრთხილე – ფერების, მასალებისა და თავად სივრცის მიმართ.
ბინის ძირითადი იდეა ეფუძნება კონტრასტს: მონოქრომული, მშვიდი ტონები ერთგვარ „მდუმარე“ ფონად იქცევა, რომლის ზედაპირზეც გამოიკვეთება ხელოვნების ნიმუშები და საგნების ოსტატურად გადაფენილი კომპოზიციები. დიზაინერებმა მიზნად დაისახეს, არ დაეტვირთათ სივრცე ზედმეტი დეტალებით. მათ შექმნეს გარემო, რომელიც მინიმალისტურია, მაგრამ არასდროსაა ცარიელი. აქ ყოველი ობიექტი ინდივიდუალურ მნიშვნელობას იძენს – იქნება ეს სკულპტურა, ავტორისეული პოსტერები, ავეჯი თუ ხელით შექმნილი დეკორატიული ელემენტი.
ბინაში ყველა ნივთს საკუთარი ადგილი აქვს: არაფერი “ყვირის”, მაგრამ ყველაფერი ჩანს. მსუბუქი ფერთა პალიტრა და ბუნებრივი ხის ფაქტურა საშუალებას აძლევს სივრცეს, გახდეს თეთრი ტილო, რომელზეც პერსონალური ამბავი იწერება.
პაბლო ეროსის კოლექციები – იქნება ეს ავანგარდული სავარძელი, არტობიექტი თუ მხატვრული ბეჭდური მასალა – ინტეგრირებულია ინტერიერში ისე, რომ იგი ყოველდღიურ ცხოვრებას მუზეუმად არ აქცევს. ეს სივრცე ნამდვილად საცხოვრებელია – თბილი, ფუნქციური და შინაარსიანი.
ბინა თითქოს მიგვითითებს იმაზე, როგორ შეიძლება თანამედროვე ადამიანს ჰქონდეს ინდივიდუალური, არასტანდარტული ხედვა სახლზე – სადაც სტილი ბრმად არ ემორჩილება ტენდენციებს, არამედ თავისუფლად მიჰყვება ცხოვრების რიტმს.
“იცხოვრე შენი ცხოვრებით” სათქმელად უფრო ადვილი, გასაბედად კი რთულია. ხშირად გაბედვა უნდა ერთი შეხედვით მარტივ საკითხებს, მაგალითად, სახლის საკუთარი გემოვნების მიხედვით მოწყობას. m2–ის კამპანია “გაბედე” სწორედ ამ საკითხზე გვაფიქრებს და კიდევ ერთხელ გვახსენებს, რომ ყველაფერი საინტერესო გაბედვით იწყება.
გაბედე, იცხოვრე შენი ცხოვრებით!
რუბრიკა „გაბედეს“ წარმდგენია m2
