თამარ ამირეჯიბის სახლი ოქროყანაში არის მაგალითი იმისა, თუ როგორ შეიძლება თანამედროვე არქიტექტურისა და დიზაინის საშუალებით შეიქმნას ეკოლოგიურად სუფთა გარემოში მდებარე კომფორტული საცხოვრებელი, რომელიც სრულად პასუხობს მფლობელების ცხოვრების სტილსა და საჭიროებებს.
აღსანიშნავია, რომ 325 კვადრატულ მეტრზე განლაგებული სახლის გეგმარება და ინტერიერის დიზაინი შეიქმნა სტუდიო „SAMI“-ს მიერ, ხოლო სარემონტო სამუშაოები, შავი კარკასის ფაზიდან დაწყებული, გათბობა-გაგრილების სისტემებითა და სრული აღჭურვით დასრულებული, მთლიანად კომპანია WINGCO-მ განახორციელა.
მფლობელისთვის მთავარი ამოცანა იყო, სივრცე ყოფილიყო ნათელი, სადა, თანამედროვე და ამავდროულად მყუდრო. ეს ეფექტი მიღწეულია ნეიტრალური ტონებისა და კონტრასტული ელემენტების სწორად შერწყმით, ხის ბუნებრივი ტექსტურების დამატებით და ავეჯის ფრთხილი კომბინაციით. შედეგად, ინტერიერი იძენს რომანტიკულ და კლასიკურ განწყობას, თუმცა არ კარგავს თანამედროვე ხასიათს.
სივრცე გამდიდრებულია ისეთი დეტალებით, რომლებიც სახლის თითოეულ წევრს ახასიათებს: ძველი ნივთები, საყვარელი ნახატები და ახალი, ფუნქციურად გააზრებული კუთხეები, რომლებიც სახლს განსაკუთრებულ იდენტობას ანიჭებს.
როგორც ჩვენი რესპონდენტი გვიამბობს, შთაგონება ინტერიერისთვის მრავალფეროვანი წყაროებიდან მოდიოდა — მოგზაურობებიდან, ფილმებიდან, ონლაინ გამოცემებიდან და ყოველდღიური ცხოვრების თითქოს უმნიშვნელო დეტალებიდანაც კი. სწორედ ამ მრავალფეროვნებამ განაპირობა სახლის დიზაინის ინდივიდუალური სახე.
სახლის მთავარი ღირსება სინათლეა, რომელიც თავისუფლად მიედინება ყველა სივრცეში, და სამზარეულოსა და ეზოს ერთიანობა, რომელიც არა მხოლოდ ვიზუალურ ჰარმონიას ქმნის, არამედ ოჯახური ცხოვრების დინამიკასაც განსაკუთრებულ სიმყუდროვეს მატებს.
თამარ ამირეჯიბის თქმით, სახლის რემონტი და მოწყობა იყო სტრესული, მაგრამ ამავდროულად სასიამოვნო პროცესი, რადგან ყოველი დასრულებული ნაბიჯი კმაყოფილებისა და აღტაცების განცდას აჩენდა. საბოლოოდ კი შეიქმნა სახლი, რომელიც არა მხოლოდ საცხოვრებელი სივრცეა, არამედ ადგილი, სადაც ყოველდღიური ცხოვრება ჰარმონიულად ერწყმის ბუნებას, სინათლესა და ოჯახურ ისტორიებს.
