დიზაინერ აკა ნანიტაშვილის სახლი მწვანე ქალაქი ლისის უბანში მდებარეობს და მის ინტერიერის დიზაინზე სტუდია WOM_project-მა იმუშავა. სამი სართულის მქონე კერძო სახლი თავიდანვე მოითხოვდა სივრცის სწორ ორგანიზებას და ატმოსფეროს ისე ჩამოყალიბებას, რომ თანაბრად შენარჩუნებულიყო როგორც ღიაობის, ასევე პრივატულობის პრინციპი.
პირველ სართულზე შესვლისთანავე იგრძნობა დიზაინის ლოგიკა — ჰოლი ბუნებრივად ებმის სასტუმრო ოთახსა და სამზარეულოს. სივრცეთა გამიჯვნის ნაცვლად, დიზაინერებმა არჩიეს ტიხრად გამოყენებული ავეჯი: მუქი წითელი საღებავით დაფარული თაროები ქმნის ერთგვარ საზღვარს, მაგრამ ამავდროულად არ ფარავს სინათლეს. ეს ელემენტი ერთდროულად ფუნქციურიცაა და დეკორატიულიც, სივრცის დინამიკას კი ვიზუალურად ამდიდრებს. თაროების ფერი მეორდება სასტუმრო ზონაშიც, რაც მთლიანობის განცდას აძლიერებს და ინტერიერს თანმიმდევრულ ვიზუალურ ნარატივად აქცევს.
„შევეცადეთ, შეგვექმნა მაქსიმალურად ნეიტრალური გარემო იატაკისა და კედლების სახით. აქცენტად გამოვიყენეთ მკვეთრი ფერის ავეჯი, რომელიც ამავდროულად ტიხრების ფუნქციას ასრულებს,” – აცხადებენ პროექტის ავტორები, ელისაბედ ხუნდაძე და ელენე პაპიაშვილი
ხის შპონით დამუშავებული კედლები და ჭერი ინტერიერს ბუნებრივ სითბოს სძენს და ამავდროულად ამცირებს ინდუსტრიული ელემენტების სიცივეს. შედეგად, მიღებულია ბალანსი სიმშვიდესა და ექსპრესიულ დეტალებს შორის — სივრცე, რომელიც თანამედროვეა, მაგრამ მასში “სახლური” სიმყუდროვე მაინც იგრძნობა.
ელენე პაპიაშვილისა და ელისაბედ ხუნდაძის ნამუშევარი კიდევ ერთხელ ამტკიცებს, რომ ინტერიერის დიზაინი მხოლოდ ესთეტიკა არ არის: ეს არის სივრცის ემოციური სტრუქტურა, რომელიც ურთიერთობებსა და ყოველდღიურობას აყალიბებს. პროექტი ნათლად აჩვენებს, რომ მინიმალისტური ფორმების, ფერთა კონტრასტისა და მასალების სიზუსტის საშუალებით შეიძლება შეიქმნას არა მხოლოდ კომფორტული, არამედ ემოციურად დატვირთული საცხოვრებელი სივრცე — სახლი, რომელიც ფუნქციურობასა და ესთეტიკას ჰარმონიულად აერთიანებს.
პროექტის ავტორები: ელენე პაპიაშვილი, ელისაბედ ხუნდაძე
დიზაინ სტუდია: WOM_project
