ხუთი მეგობარი, 90 კვადრატული მეტრი და საერთო საქმე. ასე დაიწყო ბიზნესი, რომელიც დღეს ათასზე მეტ ადამიანს აერთიანებს, 700-ზე მეტი დასახელების პროდუქტს აწარმოებს და საქართველოს ათ ქალაქშია წარმოდგენილი. 8 ნოემბერს ნოვა 20 წლის ხდება.
ოცი წელი საკმარისი აღმოჩნდა იმისთვის, რომ სამშენებლო მასალებით ვაჭრობა დიდ საწარმოო ბიზნესად ქცეულიყო. ამ გზაზე ნოვამ საკუთარი წარმოება განავითარა, საერთაშორისო ბრენდებთან პარტნიორობა გააფართოვა, საცალო ქსელი შექმნა და კაპიტალის ბაზარზეც გავიდა.
ყველაზე მნიშვნელოვანი ნაბიჯი საკუთარი პროდუქტის შექმნა იყო. ბაზრის ცოდნამ კომპანიას დაანახა, რისი წარმოება შეიძლებოდა საქართველოში. პირველ დანადგარებს ახალი მიმართულებები მოჰყვა, თითოეულ ახალ პროექტს კი — გამოცდილება, რომელიც შემდეგი ნაბიჯის გადადგმას შესაძლებელს ხდიდა.
დღეს ნოვა საქართველოში სახურავის მასალების უმსხვილესი ადგილობრივი მწარმოებელია. მის საწარმოო ასორტიმენტში 700-ზე მეტი დასახელების პროდუქტია.
„როცა პროდუქტის წარმოებას იწყებ, პასუხისმგებლობას მთელ პროცესზე იღებ. შენ ირჩევ ტექნოლოგიას, ამზადებ გუნდს და პასუხს აგებ შედეგზე. ჩვენთვის ყოველი ახალი წარმოება საქართველოში დაგროვილი ცოდნაა — გამოცდილება, რომლითაც შემდეგ უფრო რთული პროექტის გაკეთება შეგვიძლია“, — ამბობს ნოვას გენერალური დირექტორი ედიშერ ხიმშიაშვილი.
საკუთარ წარმოებას საერთაშორისო პარტნიორობები ემატება, მათ შორის — INGCO-სთან, Fawori-სა და Betek-თან თანამშრომლობა. პარალელურად, კომპანია მომხმარებელთან მისასვლელ გზებსაც აფართოებს: რეგიონულ ქსელთან ერთად ვითარდება ელექტრონული კომერცია და ციფრული სისტემები, რომლებიც გაყიდვებს, მარაგებსა და მიწოდებას ერთმანეთთან აკავშირებს.
მასშტაბის ზრდამ დაფინანსების ახალი წყაროც მოითხოვა. ნოვამ 50 მილიონი ლარის სადებიუტო ობლიგაციები გამოუშვა; ინვესტორებს შორის EBRD-ც იყო. კომპანიისთვის ეს კაპიტალის ბაზარზე პირველი ნაბიჯი და განვითარების დამატებითი რესურსია.
თუმცა საიუბილეო ისტორიის ყველაზე მნიშვნელოვანი რიცხვი მაინც ათასზე მეტია — ადამიანები, რომლებიც დღეს ნოვაში მუშაობენ.
„კომპანიის ზრდა თანამშრომლების ყოველდღიური შრომის შედეგია. ვიღაც ჩვენთან პირველ სამსახურში მოვიდა და დღეს გუნდს ხელმძღვანელობს; ვიღაც წლების განმავლობაში საწარმოო გამოცდილებას აგროვებდა და ახლა სხვებს ასწავლის. ოცი წლის თავზე ყველაზე მეტად სწორედ ამით ვამაყობთ — ადამიანებით, რომლებიც ნოვასთან ერთად გაიზარდნენ“, — აღნიშნავს ედიშერ ხიმშიაშვილი.
შემდეგი ეტაპი წარმოების გაძლიერებასა და რეგიონულ განვითარებას უკავშირდება. დღის წესრიგშია ახალი ტექნოლოგიები, ლოჯისტიკა და საექსპორტო შესაძლებლობების გაფართოება.
„ახალ ბაზარზე ჩვენი ოცწლიანი ისტორია წინასწარ უპირატესობას ვერ მოგვცემს — იქ პროდუქტითა და მუშაობის ხარისხით შეგვაფასებენ. ამიტომ შემდეგი ეტაპისთვის მზადება დღეს, ჩვენს საწარმოებში და გუნდებში იწყება“, — ამბობს გენერალური დირექტორი.
პირველი 90 კვადრატული მეტრი ნოვასთვის დიდი ხანია პატარაა. ახლა კომპანია შემდეგი ბაზრისთვის ემზადება.
[პარტნიორის კონტენტი]
