მაო შენ ჩიანგი ტაივანში მოღვაწე არქიტექტორი და ინტერიერის დიზაინერია, რომელიც თავის თავს პირველ რიგში ბეტონის მცოდნედ და თაყვანისმცემლად მიიჩნევს. ჩიანგი შეპრყობილია სკანდინავიური ესთეტიკით, განსაკუთრებით კი ავეჯით, რომელსაც ის თავის ცნობილ შოურუმში, Mori/Casa-ში ყიდის. როცა ჩიანგმა საკუთარი სახლის დიზაინზე მუშაობა დაიწყო, ინტერიერის გეგმა სწორედ ბეტონსა და სკანდინავიური დეტალებზე დაყრდნობით შექმნა.
სახლი ტაივანის ტროპიკულ ქალაქში, იუ-გუანგში მდებარეობს და მაღალი ხეებით, ბუნების საფარითაა გარშემორტყმული. შენობის კონსტრუქცია ბეტონისგანაა დამზადებული და სამკუთხედის ფორმა აქვს. სასურველი მასალისგან სასურველი ფორმის სახლის ასაგებად ჩიანგს სამი წელი დასჭირდა. სამი წელი დასჭირდა მისი დიზაინის შექმნასაც. არქიტექტორის მიზანი იყო ისეთი არქიტექტურული ნიმუშის შექმნა, რომელიც მომდევნო საუკუნეშიც შეუცვლელად მოდური დარჩებოდა. მართლაც, ეს ტაივანური სახლი მინიმალისტური სტილის ერთ-ერთ აღსანიშნავ მონუმენტად იქცა.
სამკუთხედის ფორმის სახლი სამსართულიანია და ასევე მოიცავს ჩაის სმის საცერემონიო ოთახს, რომელიც ტყეს გაჰყურებს და თეატრის სცენის მსგავსი კონცეფციითაა აგებული. ინტერიერი დანიური დიზაინის კლასიკური ნიმუშებითაა გაფორმებული.
ჩიანგის სახლის პირველ სართულზე გაერთიანებულ სამზარეულოსა და სასადილო ოთახს შევხვდებით, რომლებიც ბაღს უკავშირდებიან. ამ თავისუფალი, მომხიბვლელი სამზარეულოს ინტერიერი ძირითადად Vipp-ის ბრენდის ავეჯითა და აქსესუარებითაა მოწყობილი. სასადილო მაგიდა, რომელიც მაშინვე იპყრობს მნახველთა ყურადღებას, თავად ჩიანგის მიერაა შექმნილი და ირგვლივ Hans Wegner-ის “Wishbone”-ის საკულტო სკამები აქვს შემოწყობილი.
სასადილო სივრცის კედლები ხის წვრილი პანელებითაა გაფორმებული, რაც შენობის ამ ნაწილს სახლურ, თბილ იერს ანიჭებს. ჩიანგის სამუშაო სივრცე-კაბინეტი პირველ სართულზე ყველაზე ჩუმ, შემალულ ადგილასაა განთავსებული. აქვე არსებული კიბეებით სახლის მეორე სართულზე მოვხვდებით, სადაც გვხვდება სტუმრებისთვის განკუთვნილი საძინებელი ოთახი და ტრადიციული ბუდისტური სამლოცველო.
მთელ სახლში ვხვდებით ბეტონისა და ხის გაერთიანებით, ერთმანეთთან შერწყმით მიღებულ ჰარმონიულ სივრცეებს, თუმცა ყველაზე მეტად ეს ორი მასალა საძინებელ ოთახებში გვხვდება. ცემენტშივეა გამოკვეთილი სამკუთხედის ფორმის ფანჯრები, რომლებიც სახლის განათებასა და განიავებაში დიდ როლს ასრულებს.
ფოტოგრაფი: Anders Hviid.
