თანამედროვე დიზაინისა და არქიტექტურის სფეროში ხშირად ჩნდება იდეები, რომლებიც მხოლოდ ესთეტიკურ ინტერესს არ ეფუძნება — ისინი კონკრეტული საჭიროებიდან, პირადი გამოცდილებიდან და ხანგრძლივი ძიების პროცესიდან იბადება. სწორედ ასეთ პლატფორმად იქცა Georgian Objects — სივრცე, რომელიც ქართველი დიზაინერებისა და არქიტექტორების მიერ შექმნილ ავთენტურ ობიექტებს აერთიანებს და მათ ახალ კონტექსტში წარმოჩენის შესაძლებლობას აძლევს.
Georgian Objects-ის დამფუძნებლის, მარიამ წიკლაურის ისტორია კი თავად ამ პლატფორმის იდეას ჰგავს — მრავალწლიანი ძიების, პროფესიული გარდატეხებისა და საკუთარი გზის თავიდან აღმოჩენის პროცესს.
მარიამი პროფესიით არქიტექტორი და ინტერიერის დიზაინერია. ბავშვობიდან ზუსტად იცოდა, რომ შემოქმედებით სფეროში უნდოდა საკუთარი თავის პოვნა და სწორედ ამ სურვილით ჩააბარა სამხატვრო აკადემიაში. თუმცა, როგორც თავად ამბობს, რეალობა მალევე აღმოჩნდა იმ მოლოდინებისგან განსხვავებული, რომელიც საკუთარ მომავალზე ჰქონდა შექმნილი. სწავლის პერიოდში სხვადასხვა სფეროს მიმართ გაუჩნდა ინტერესი, რამაც მისი პროფესიული გზა უფრო მრავალფეროვანი, მაგრამ ამავდროულად ქაოსურიც გახადა. დღეს ამ გამოცდილებას მარიამი საკუთარი ცხოვრების ყველაზე მნიშვნელოვან გარდამტეხ ეტაპად აღიქვამს — წერტილად, რომელმაც საბოლოოდ სრულიად ახალი მიმართულება აჩვენა.
ერთ-ერთ არქიტექტურულ კომპანიაში გაყიდვების მენეჯერის პოზიციაზე მუშაობამ მარიამისთვის სრულიად ახალი პერსპექტივა გააჩინა. სწორედ აქ ჩამოუყალიბდა ის ხედვა, რომელმაც მოგვიანებით Georgian Objects-ის შექმნამდე მიიყვანა — გააზრება იმისა, თუ რას ნიშნავს საქმიანობა, რომელიც ერთდროულად აერთიანებს პირად ინტერესს, მისიას და იმ ღირებულებას, რომელსაც სხვებისთვის ქმნი.
ამ პერიოდში, მიუხედავად იმისა, რომ კვლავ სტაბილურად მუშაობდა საკუთარი პროფესიით, უკვე გრძნობდა, რომ მხოლოდ ტრადიციული ჩარჩოები აღარ აკმაყოფილებდა. თავდაპირველად უბრალოდ არქიტექტურისა და ინტერიერის მიმართულებით გვერდის შექმნა გადაწყვიტა, თუმცა ინტერესმა მალევე უფრო კონკრეტული ფორმა მიიღო. მსოფლიო დიზაინის ისტორიაში კარგად ცნობილი ობიექტებისა და ავტორების — Marcel Breuer-ის, Ludwig Mies van der Rohe-ს, Mario Bellini-სა და სხვათა — მიმართ ინტერესმა მას სხვა მნიშვნელოვანი კითხვა გაუჩინა: რატომ არ ჩანდა ფართო სივრცეში ქართველი დიზაინერების ნამუშევრები?
მარიამმა დაიწყო ქართველი ავტორების ძიება, რომლებიც ქმნიდნენ ავთენტურ ავეჯსა და ინტერიერის ობიექტებს — მაგიდებს, სანათებს, სკამებსა და სხვა გამოყენებით ნივთებს — და ამავდროულად მონაწილეობდნენ საერთაშორისო კონკურსებში, თუმცა მათი საქმიანობა ხშირად მხოლოდ ვიწრო პროფესიულ წრეში რჩებოდა ცნობილი.
სწორედ აქ გაჩნდა Georgian Objects-ის შექმნის იდეაც — პლატფორმის, რომელიც თავს მოუყრიდა ქართველი დიზაინერებისა და არქიტექტორების ნამუშევრებს და მათ ფართო აუდიტორიას გააცნობდა. თავდაპირველად მარიამს ეგონა, რომ ერთი დიდი გამოფენა საკმარისი იქნებოდა ამ სფეროს პოტენციალის საჩვენებლად, თუმცა პროცესის განვითარებასთან ერთად მიხვდა, რომ თემატური ფორმატი ბევრად საინტერესო და ეფექტური იქნებოდა.
ასე დაიგეგმა პირველი გამოფენები — კერამიკის, შემდეგ კი სანათების მიმართულებით. მოგვიანებით Georgian Objects-მა Open Call-იც გამოაცხადა, რომლის იდეა იყო, რომ დიზაინერებს მხოლოდ ერთი ან ორი მასალის გამოყენებით შეექმნათ საინტერესო და ფუნქციური ობიექტები — სკამები, სანათები და სხვადასხვა გამოყენებითი ნივთები.
პლატფორმის მთავარი მიზანი თავიდანვე ქართველი დიზაინერების მხარდაჭერა და მათი საქმიანობის მნიშვნელობის წარმოჩენა იყო. Georgian Objects-ი ცდილობს დაამტკიცოს, რომ ადგილობრივ დიზაინს არა მხოლოდ კულტურული, არამედ რეალური კომერციული და საგალერეო პოტენციალიც აქვს. ამ პროცესში უკვე არაერთმა ახალგაზრდა თუ გამოცდილმა დიზაინერმა იპოვა საკუთარი მიმართულება, ხოლო სხვადასხვა კოლაბორაციამ და პროექტმა მათი ნამუშევრების განვითარებას ახალი შესაძლებლობები გაუხსნა.
ამ იდეის გაგრძელებაა პროექტი LESS IS MORE, რომელიც მიზნად ისახავს ბაზარზე არსებული მასობრივი წარმოების პროდუქციის ჩანაცვლებას ქართველი დიზაინერებისა და ადგილობრივი საწარმოების თანამშრომლობით შექმნილი ობიექტებით. პროექტის ფარგლებში დიზაინერებს საშუალება მიეცათ, საკუთარი ხედვა განევითარებინათ როგორც საგალერეო-საექსპოზიციო, ისე კომერციული მიმართულებით — შეექმნათ ნივთები, რომლებიც ერთდროულად ატარებს ინდივიდუალურ ხელწერას, ფუნქციურობასა და თანამედროვე ქართული დიზაინის იდენტობას.
„1მ²
„1მ²“ მინიმალისტური ობიექტია, რომელიც შეზღუდვის იდეიდან დაიბადა — იგი მხოლოდ 1 კვადრატული მეტრის მეტალის ფურცლისგან არის შექმნილი. ნივთი ერთდროულად რამდენიმე ფუნქციას აერთიანებს: შეიძლება გამოყენებულ იქნას როგორც სკამი, სათავსო ან ტუმბო. შიგნით დამალულია ორი თარო, რომელიც მაგნიტური მექანიზმით იღება და იკეტება. მოძრავი ბორბლები მას სივრცეში თავისუფლად გადაადგილების შესაძლებლობას აძლევს, ხოლო მინიმალური მასალის გამოყენება პროექტის ეკოლოგიურ მიდგომას უსვამს ხაზს.
„სერია 1010“
„სერია 1010“ მინიმალიზმის იდეაზე დაფუძნებული კოლექციაა, რომელიც საწერ მაგიდას, სკამსა და სანათს აერთიანებს. თითოეული ფორმა მაქსიმალურად გაწმენდილი და გააზრებულია — ზედმეტი დეტალების გარეშე. მწვანე ფერი კოლექციას ენერგიას მატებს, მკაფიო გეომეტრია კი მის ფუნქციურ და სტრუქტურულ ხასიათს აძლიერებს. ეს არის ობიექტები, რომლებიც ინტერიერს არ ტვირთავს, არამედ სივრცეს სიმსუბუქესა და სუნთქვის შესაძლებლობას აძლევს.
სავარძელი
ეს პროექტი ადგილობრივი ტრადიციული ფორმების გადააზრებას ეძღვნება. ავტორებმა შთაგონებად გამოიყენეს ძველი ქართული ავეჯის იშვიათი ნიმუშები და Charlotte Perriand-ის რბილი, მომრგვალებული ხაზები, რის შედეგადაც შეიქმნა ობიექტები, რომლებიც ერთდროულად ატარებს კულტურულ მეხსიერებასა და თანამედროვე დიზაინის ენას. პროექტის საწყისი იდეა პატარა სკამი იყო, თუმცა ფორმისა და სიცარიელის კვლევის პროცესში ის საბოლოოდ ერგონომიულ და სკულპტურულ სავარძლად გარდაიქმნა.
სარკე Nami
სერია Nami სკანდინავიური მინიმალიზმითაა შთაგონებული, თუმცა დიზაინერები მასში მცირე „მაგიის“ დამატებას ცდილობენ. პროექტის მთავარი კონცეფცია ფერთა და ფორმის თამაშია — ჩარჩოს გეომეტრია სხვადასხვა ვიზუალურ რიტმს ქმნის და სარკეს მხოლოდ ფუნქციურ ობიექტად არ ტოვებს. ფიჭვისა და წყლის ბაზაზე დამზადებული პიგმენტების გამოყენება პროექტს ბუნებრივ და მსუბუქ ხასიათს ანიჭებს.
პროექტ LESS IS MORE-ის ფარგლებში შექმნილი ნამუშევრები ფორმის, ხაზისა და სივრცის ურთიერთობაზეა დაფუძნებული. ნამუშევრები ეფუძნება მინიმალიზმის პრინციპებს, სადაც ფორმა დაყვანილია არსებითამდე და ყურადღება გამახვილებულია მის ვიზუალურ აღქმაზე. ობიექტები არ აღიქმება სტატიკურ ნივთებად და უფრო სკულპტურულ ელემენტებად იქცევა. აქ ფორმა ყოველთვის პირველ ადგილზე დგას, ხოლო ფუნქცია მას თანდათან, ფრთხილად ერწყმის.
