იტალიური ავეჯის მაღალი სტანდარტების, ხარისხისა და სასურველობის შესახებ, ალბათ, ყველას გვსმენია, თუმცა ბევრი არ ვიცით ამ წარმოდგენების პოპულარიზაციაში უდიდესი დამსახურების მქონე ბრენდების შესახებ. ერთ-ერთი ასეთი კომპანიაა Cassina, რომელიც მეოცე საუკუნის პირველი ნახევრიდან მოყოლებული ახდენს რევოლუციებს დიზაინის სამყაროში.
Cassina 1927 წელს, მილანთან ახლოს, პატარა ქალაქ მედაში დააარსეს 18 წლის ანტრეპრენერმა, ცეზარე კასინამ და მისმა ძმამ, უმბერტომ. თავიდან კომპანია ადგილობრივ ბაზარს იყო მორგებული და ოჯახის წევრების მიერ დამზადებული ხის მაგიდები მედაში იყიდებოდა, თუმცა ცეზარე კასინას გამაოგნებელი არტისტული ხედვისა და მარკეტინგული ამბიციის წყალობით, Cassina-მ წარმოება გააფართოვა და საზოგადოებას უამრავი საკულტო ავეჯი შესთავაზა.
Cassina დიზაინერული სამყაროსთვის იშვიათ მიდგომას იყენებს – ბრენდი ახალგაზრდა, გამოუცდელ დიზაინერებს აძლევს თავიანთი წამოსახვისა და ფანტაზიის უნარის რეალიზების საშუალებას. ცეზარე კასინა ხშირად აფინანსებდა ახალგაზდა დიზაინერებს, მაგალითად გაეტანო პეშეს, და სანაცვლოდ არაფერს სთხოვდა. მათ ავალებდა, რომ ეს ფული კვლევებსა და თვალსაწიერის გაფართოებაში დაეხარჯათ, თუმცა შემდეგ ეს ხელოვანები თავიანთი უცხო, უნიკალური იდეებით Cassina-ს აკითხავდნენ. პეშეს პოლიურეთანის სავარძლების იდეა სწორედ ცეზარე კასინამ აქცია რეალობად და საკუთარ ბრენდს კიდევ უფრო გაუთქვა სახელი.
მეორე მსოფლიო ომს 1950-იან წლების იტალიაში ეკონომიკური აყვავების ხანა მოჰყვა. ამ პერიოდში ქვეყანაში პროდუქციის სერიულად წარმოება დაიწყო. Cassina-მ დრო იხელთა და პოტენციური მყიდველის ფსიქოლოგიისა და ბაზრის შესწავლას შეუდგა. ისინი იკვლევდნენ იმ ცხოვრების ტემპებს, წესებსა და საჭიროებებს, რომლებიც ომის შემდეგ დადგა ევროპაში და შედეგმაც არ დააყოვნა – Cassina არამხოლოდ ევროპის, არამედ მთელი მსოფლიოს ბაზარზე ერთ-ერთ ყველაზე მოთხოვნად და გაყიდვად კომპანიად იქცა.
Cassina-ს კოლექციებიდან აღსანიშნავია ისეთ ლეგენდარულ, გენიოსებად აღიარებულ დიზაინერებთან და არქიტექტორებთან თანამშრომლობით შექმნილი ავეჯი, როგორებიც იყვნენ ლე კორბუზიე, გერიტ რიტველდი, ფრენკ ლოიდ რაითი, ჩარლზ რენი მაკინტოში, ჯიო პონტი და ა.შ.
ბრენდი სანათების ფართო ასორტიმენტსაც გვთავაზობს, რომლებსაც განათების დიზაინერები უდიდესი ზრუნვითა და ყველა ტიპის ინტერიერის შესწავლის საფუძველზე ქმნიან.
დღეს Cassina-ს პროდუქცია კვლავ მედაში იწარმოება, ტრადიციების პატივისცემითა და თანამედროვე გამოწვევების მიხედვით. აქ შექმნილი თითოეული ავეჯი იმ მიზნით იქმნება, რომ მფლობელს მთელი ცხოვრების განმავლობაში გაუძლოს და ერთგულად შესძინოს მის ინტერიერს მშვენიერება და დახვეწილობა. ბრენდის პროდუქცია სერიულად, ინდუსტრიულად იწარმოება, თუმცა თითოეულ ნაკეთობას ოსტატების ჯგუფი ამოწმებს და მის ყოველ მცირე დეტალს აკვირდება, რათა ბრენდის ხარისხის მაჩვენებელი კვლავ უმაღლეს წერტილში დარჩეს.
Cassina-ს პროდუქციის შეძენა საქართველოში შოურუმ Opera Design-შია შესაძლებელი.
