რემონტი საკმაოდ შრომატევადი საქმეა და რაოდენ დასანანია, როდესაც არასწორი თანმიმდევრობის გამო, ზოგიერთი სამუშაოს განმეორებით ჩატარება, ან სულაც გაკეთებულის მორღვევაა აუცილებელი. დღეს ყველა იმ სამუშაოზე და მის რიგითობაზე გიამბობთ, რომლებიც ბინის კომპლექსური რემონტის დროს ტარდება. ჩამოთვლილი 16 ეტაპი დეტალური გიდია, რომელიც ზედმეტი დროის, ნერვებისა და ფულის დახარჯვას აგარიდებთ.
1. პირველი ეტაპი – პროექტი
რითაც ნებისმიერი სარემონტო სამუშაო უნდა დაიწყოს, ეს კარგი პროექტია. მომავალმა შემსრულებელმა ფერი თუ არა, მომავალი იატაკის საფარის ტიპი მაინც უნდა იცოდეს (იქნება ეს ლამინატი, პარკეტი თუ რამე სხვა). ასევე წინასწარ უნდა იყოს განსაზღვრული კედლებისა და ჭერის მოსაპირკეთებელი მასალების ტიპი. პროექტის შემსრულებელთან შეთანხმების შემდეგ კი მომდევნო ეტაპები იწყება.
2. მეორე ეტაპი – სამუშაო ჯგუფის პირობები
აუცილებელია მომავალი სარემონტო ჯგუფისთვის ფართში სამუშაო და საცხოვრებელი პირობების ორგანიზება. ამაში შედის: დროებითი ელექტრო მომარაგება, დროებითი საკანალიზაციო და წყლის მიწოდება, ობიექტზე დროებითი სამზარეულოს, სამრეცხაოსა და საძინებელი ადგილების მოწყობა. ასევე ცვეთადი ინსტრუმენტების მომარაგება (რომლებიც რემონტის შემდეგ უვარგისია). ამას გარდა, ხდება გადასაფარებელი ცელოფნის, ნაგვის ტომრებისა და დალაგების საბაზისო ნივთების შეძენა (ცოცხი, აქანდაზი და ა.შ).
3. მესამე ეტაპი – სამონტაჟო სამუშაოები
სამონტაჟო სამუშაოები იწყება. ინგრევა ყველა სისტემური ტიხარი, ხორციელდება კარის ღიობების დამტკიცებული ზომების მიხედვით ფორმირება. აივნებისა და ლოჯიების შემინვისთვის მომზადება.
4. მეოთხე ეტაპი
ამ ეტაპზე ხდება კარ-ფანჯრის ამზომველების მოწვევა. ფანჯრების აზომვასთან ერთად შემოსასვლელი კარის ზომებსაც იღებენ. ამავე ეტაპზე საკანალიზაციო დგარების, ცხელი და ცივი წყლის გათიშვა-ჩართვის ვადები თანხმდება. თუ ბინაში თბილი იატაკი იქნება, მისი პლასტმასის მილების მონტაჟი უშუალოდ სადემონტაჟო სამუშაოების შემდგომ ხდება.
5. მეხუთე ეტაპი
შემდეგი ეტაპი ჭერის გასუფთავება-დაგრუნტვაა. იმავდროულად დამკვეთის მიერ ყველა მოსაპირკეთებელი მასალის (შპალერი, ფილა, პარკეტი, საღებავი, კარი და ა.შ) საბოლოო შერჩევა ხდება. ასევე სამზარეულოს დამამზადებლის არჩევა. ამ ეტაპზევე სამუშაო ჯგუფის მიერ ტიხრების ამოყვანა, კედლების ზედაპირების დამუშავება და საბოლოო მოპირკეთებისთვის მომზადება ხორციელდება. ასევე ვენტილაცია-კონდიცირების კონკრეტული მოდელებისა და მისი სამონტაჟო კომპანიის შერჩევა. სველი წერტილებისა და საჭიროების შემთხვევაში, სხვა ოთახების იატაკების ჰიდროიზოლაცია, იატაკის ბეტონ კონტაქტით დამუშავება და მოჭიმული იატაკის დასხმისთვის მომზადება.
6. მეექვსე ეტაპი
მოჭიმული იატაკის დასხმამდე ხორციელდება: შემოსასვლელი კარისა და ყველა ფანჯრის მონტაჟი, ლოჯიებისა და აივნების შემინვა. ამავე ეტაპზე კონდიცირების სისტემის სამონტაჟო კომპანიას იწვევენ, რომელიც კედელზე კომუნიკაციების გზებს დაიტანს. საჭირობის შემთხვევაში, იწვევენ დაცვის, ვიდეო თვალთვალის, ტელევიზიისა და ინტერნეტის სპეციალისტებს. მათგან ტექნიკური რეკომენდაციების მიღების შემდგომ, ობიექტზე მოწვეული ელექტრიკოსები მონტაჟს განახორციელებენ (ეს მნიშვნელოვნად დაზოგავს თანხებს).
7. მეშვიდე ეტაპი
მოჭიმული იატაკის არმირება, გასწორება და დასხმა ხდება. ამ დროს უნდა გვახსოვდეს, რომ იატაკი აბაზანასა და ტუალეტში 5 სმ-ით დაბალი უნდა იყოს, ვიდრე დანარჩენ ბინაში.
8. მერვე ეტაპი
მოჭიმული იატაკის გაშრობის შემდეგ ძველი გათბობის გაყვანილობის დემონტაჟი და ახლის დაყენება ხდება. ამავე ეტაპზეა მიზანშეწონილი სამზარეულოს დამამზადებელი კომპანიის პირველი ვიზიტი და მათგან კონკრეტული ელექტრო, ცხელი და ცივი წერტილების ტექნიკური რეკომენდაციების მიღება.
9. მეცხრე ეტაპი
ელექტობისა (სხვა საკომუნიკაციო ქსელების) და სანტექნიკის, ასევე კონდინციონერის საკომუნიკაციო ტიხრების გაყვანა.
10. მეათე ეტაპი
ობიექტზე ეგრეთწოდებული ფალშ-კედლების აღმართვა, ყველა კომუნიკაციის შეფუთვა და საბოლოო ზედაპირის მომზადება.
11. მეთერთმეტე ეტაპი
სველი წერტილების ფილით მოპირკეთება.
12. მეთორმეტე ეტაპი
მას შემდეგ, რაც ყველა მტვრიანი სამუშაო დასრულებულია, კედლებზე შპალერი იკვრება (ან იღებება). ამის შემდგომ ჭერისა და იატაკის საფარის დადება ხდება.
13. მეცამეტე ეტაპი
შიდა კარების მონტაჟი, თაღების კორექტირება, ჩარჩოების დაყენება, სამზარეულოს საბოლოო აწყობა და ავეჯის შეტანა.
14. მეთოთხმეტე ეტაპი
პლინტუსების, როზეტებისა და ჩამრთველების, ასევე კონდინციონერის ბლოკის მონტაჟი.
15. მეთხუთმეტე ეტაპი
სულ ბოლოს უნიტაზი და სააბაზანოს შემრევები დგება (თუ არ გინდათ, რომ რემონტის დროს სხვამ ისარგებლოს).
16. მეთექვსმეტე ეტაპი
გენერალური დალაგება.
