დღეს ლამინატის დაგებისას დაშვებულ შეცდომებსა და იმ რეკომენდაციებს განვიხილავთ, რომელთა გათვალისწინებითაც თავიდან აირიდებთ დროისა და ზედმეტი თანხის ხარჯვას.
შეცდომა #1
გავრცელებული მოსაზრების თანახმად, ლამინატი კედელზე მჭიდროდ მიბჯენილი უნდა იყოს. სინამდვილეში, ამის გამო იატაკის ერთგვაროვნება დროთა განმავლობაში ირღვევა და ლამინატი ზიანდება. აუცილებელია, კედელსა და იატაკს შორის დაახლოებით 8-10 მმ. ადგილი დატოვოთ, რათა ლამინატს გაფართოების საშუალება მისცეთ.
შეცდომა #2
ხშირია შემთხვევა, როდესაც სხვადასხვა სახის იატაკის სიმაღლესა და სისქეს არ ითვალისწინებენ. მნიშვნელოვანია, ეს საკითხი წინასწარ გაიაზროთ, რათა ლამინატის დაგების შემდეგ ზედაპირის ერთგვაროვნება შენარჩუნდეს.
შეცდომა #3
იქ, სადაც ლამინატი სხვა ტიპის იატაკს უერთდება, აუცილებელია ე. წ. გადამყვანი გამოიყენოთ. გარდა ამისა, მნიშვნელოვანია, იგი ყველა მხრიდან უხილავი იყოს.
შეცდომა #4
გავრცელებული შეცდომაა ლამინატის დაგება პლინტუსის ტიპის განსაზღვრის გარეშე. სხვადასხვა სახის პლინტუსს განსხვავებული სიდიდის ღიობის დაფარვა შეუძლია, ამიტომ ეს გადაწყვეტილება ლამინატის დაგებამდე უნდა მიიღოთ.
შეცდომა #5
ხშირად ლამინატს წმენდენ ხსნარებით, რომლებიც მას აზიანებს. სასურველია, ამ მიზნით უბრალო სველი ტილო ან მწარმოებლის მიერ რეკომენდებული საწმენდი საშუალება გამოიყენოთ.
შეცდომა #6
ბევრმა არ იცის, რომ ლამინატის განიავება აუცილებელია. გაითვალისწინეთ, რომ მისი დაგების შემდეგ სივრცის დაკეტვა დაუშვებელია.
შეცდომა #7
ქვეშსაგების დაგებისას შეერთებებისთვის წებოვანი ლენტი უნდა გამოიყენოთ, რათა ზედაპირი ერთგვაროვანი გამოვიდეს.
შეცდომა #8
გაითვალისწინეთ, რომ თუკი იატაკის გათბობას იყენებთ, ყველა ტიპის ლამინატი არ გამოგადგებათ. შესაბამისად, შეძენამდე უნდა გაარკვიოთ, თქვენ მიერ შერჩეული მოდელი მსგავსი პირობებისთვის რამდენად შესაფერისია.
შეცდომა #9
ლამინატის დაგების მიმართულება აუცილებლად წინასწარ უნდა განსაზღვროთ, რათა მისი აყრა არ მოგიწიოთ და ზედმეტი ხარჯიც თავიდან აიცილოთ.
შეცდომა #10
ნუ შეიქმნით ცრუ მოლოდინებს იმის შესახებ, რომ ლამინატის შეერთებები ერთ ხაზზე დალაგდება. ზოგადად, რეკომენდებულია, ლამინატი გემბანური ტიპის იატაკის მსგავსად დააგოთ.
შეცდომა #11
დამატებით იქონიეთ დაახლოებით 1მ2 ლამინატი, რათა დაზიანების შემთხვევაში, გაფუჭებული ნაწილის გამოცვლა შეძლოთ. გაითვალისწინეთ, რომ, შესაძლოა, მომავალში იდენტური ლამინატი ვეღარ იშოვოთ.
შეცდომა #12
როდესაც ლამინატს შეიძენთ, დაგებამდე 48 საათი მაინც უნდა მოიცადოთ, რადგან, როგორც წესი, ამ ტიპის იატაკი გარემო პირობების მიხედვით ფართოვდება ან იკუმშება.
