აღნიშნული ბინის საერთო ფართი 62 კვადრატულ მეტრს შეადგენს და მასზე დიზაინერმა ნინი ჯღამაძემ იმუშავა.
პროექტის ავტორის მთავარი ამოცანა იყო ბინის ოპტიმალური დაგეგმარება, ერთიანი და ნათელი სივრცის შექმნა ფუნქციური და პრაქტიკული ზონირების მეშვეობით. აღნიშნული მიზნის განსახორციელებლად შემუშავდა კონცეფცია, რომლის თანახმად, მოიხსნა ყველა ზედმეტი ტიხარი, სამზარეულოს გადატანა მოხდა ლოჯის ნაწილში და შედეგად, შეიქმნა ერთგვარი სტუდიური ტიპის ბინა.
გამომდინარე იქიდან, რომ ჭერის სიმაღლე დაბალია, დიზაინერმა კედლებისა და ჭერის ღია ტონებში გადაწყვეტა არჩია. ინტერიერში გამოყენებულია ნატურალური მასალები. უმშვენიერესი მუხის ხის კონსოლი, სასადილო და ჟურნალის მაგიდები დამზადებულია 200 წლიანი ხისგან, რომელიც ნინი ჯღამაძემ ძველ თბილისში სახლების რეკონსტრუქციის დროს მოიპოვა. მაგიდის ზედაპირები კი ძველი თბილისური სახლების საყრდენი კონსტრუცქიებისგან არის გამოთლილი.
ინტერიერში ასევე გვხვდება 60-იანი წლების სავარძლები, რომელის ტექსტილიც ერთგვარი აქცენტია ბინაში. რაც შეეხება სახლის დეკორს, ინტერიერში ისეთი მხატვრების ნამუშევრები ფიგურირებს, როგორიც არის კოკა ცხვედიანი, ჩუბჩიკა, დათო ქორიძე და ა.შ.
დიზაინერი: ნინი ჯღამაძე
დიზაინ სტუდია: Nini Jgamadze Design
