აბაზანა სახლის ერთ-ერთ უმნიშვნელოვანეს ზონას წარმოადგენს. ის დიდი ხანია იქცა სახლის სრულფასოვან ოთახად. თანამედროვე ინტერიერის დიზაინში ეს სივრცე მხოლოდ ფუნქციურ დანიშნულებას აღარ ასრულებს, შესაბამისად, დღეს ადამიანები მის მოწყობას დიდ დროსა და ძალისხმევას ანდომებენ.
მიუხედავად იმისა, რომ აბაზანაში იმდენად დიდ დროს არ ვატარებთ, როგორც სამზარეულოში ან საძინებელში, ამ სივრცის გარეშე თანამედროვე ცხოვრება წარმოუდგენელია. სწორედ სააბაზანო ოთახი იძლევა იმის საშუალებას, რომ ადამიანებმა შეძლონ განმარტოება, განტვირთვა და კოსმეტიკურ-ჰიგიენური პროცესების პრივატულად წარმართვა. აქედან გამომდინარე, აბაზანის დიზაინი უნდა იყოს არა მხოლოდ პრაქტიკული, არამედ მყუდრო, სასიამოვნო და ვიზუალურად მიმზიდველი. თუ ჯერ ვერ გადაწყვიტეთ, რა სტილში გსურთ თქვენი სველი წერტილების გაფორმება, ეს სტატია ნამდვილად დაგეხმარებათ შთაგონების მიღებაში.
