საბჭოთა პერიოდის შემდეგ რთულია თბილისის არქიტექტურა რომელიმე კონკრეტულ სტილს მივაკუთვნოთ. აქ ვხვდებით როგორც ერთფეროვან, მასშტაბურ საცხოვრებელ კორპუსებს, ასევე მასიმილიანო ფუკსასის, მიკელე დე ლუკის მასიურ, ნაკლებად კონტექსტურ პროექტებსაც. თბილისის თანამედროვე არქიტექტურის პრაქტიკაში ასევე არის ქართველი არქიტექტორების მიერ შექმნილი რამდენიმე ნამუშევარი, რომლებმაც თავიანთი იდეითა და დიზაინით საერთაშორისო აღიარება მოიპოვეს.
სტატიაში წარმოგიდგენთ ქართული არქიტექტურული ოფისების 5 შენობას თბილისში:
The Grove Design Hotel / Laboratory of Architecture #3
ფოტოები: nakanimamasakhlisi
The Grove Design Hotel არის ქართული არქიტექტურული კომპანია L0A-ს პროქტი, რომელიც კვინიტაძის ქუჩის 8 ნომერში მდებარეობს. მისი მშენებლობა 2017 წელს დასრულდა და სამშენებლო ფართი 2500 კვადრატული მეტრია. როგორც არქიტექტორები აღნიშნავენ, ეს ნაგებობა ერთგვარი ხიდია ძველი, ისტორიული შენობების და ბოლო პერიოდში აშენებული მაღალი საოფისე შენობების, რომლებიც თბილისის ამ ნაწილში მდებარეობს. შენობის ფორმის მკარნახებელი ტერიტორიაზე არსებული კიპარისის ხეებია, რომლებიც ინტეგრირებულია პროექტში. სასტუმროს სახელიც ამ ხეებს უკავშირდება.
Corner Pines / Giorgi Khmaladze Architects
ფოტოები: გიორგი მამასახლისი
პროექტის მიზანი იყო ექსტროვერტული სივრცის შექმნა, რომელსაც უჩინარი საზღვარი აქვს შენობის ინტერიერსა და ექსტერიერს შორის. ეს სივრცე პასუხობს გარშემო მდებარე საცალფეხო ბილიკებს და არსებული ტროტუარი გრძელდება შიდა სივრცეში. როგორც არქიტექტორებმა ჩაიფიქრეს, მის შიგნით მყოფებს უნდა ჰქონდეთ ისეთი განცდა, თითქოს გარე სივრცეში არიან. შენობის ფორმა და გეგმარება განპირობებულია არსებული ფიჭვის ხეებით, შენობა მათ გარშემოა დაგეგმარებული. შენობის ერთ-ერთი ხილული ელემენტი – სახურავი – ჰგავს ხელოვნურ ტოპოგრაფიას. მეორე ხილული ელემენტია ინტერიერის კიბე, რომელიც ფიჭვის ხის გარშემო ტრიალებს და მიწისპირა სართულს სახურავთან აკავშირებს.
Bagebi Residential Block / WUNDERWERK
საცხოვრებელი შენობა არქიტექტურულ ოფისს WUNDERWERK-s ეკუთვნის და თბილისში, ბაგების მიმდებარე ტერიტორიაზე მდებარეობს. მისი მშენებლობა 2013 წელს დაიწყო და 2015 წელს დასრულდა. შენობა 35 ბინას მოიცავს და მისი ფართობი 6150 კვადრატული მეტრია. დამკვეთის ინტერესი კომერციული პროექტის შექმნის ნაცვლად იყო რომ შექმნილიყო ჯანსაღი, ხელგაშლილო საცხოვრებელი გარემო მომიჯნავე სატყეო ზონასთან. შენობის მნიშვნელობა, როგორც არქიტექტორი აღნიშნავს, ფუნქციური ფორმის განვითარების პროცესში უბრუნდება მის არქეტიპულ საწყის მდგომარეობა – შავი კარკასის ცნებას.
Tbilisi Prosecutors Office / Architects of Invention / MUA – Architecture & Placemaking
თბილისის პროკურატურის შენობა არქიტექტურული კომპანია Architects of Invention-ის პროექტია რომლის მშენებლობაც 2012 წელს დასრულდა. ფირმამ ეს კონცეფცია კონკურსის ფარგლებში წარმოადგინა, სადაც გაიმარჯვა. შენობა მოიცავს საოფისე ფართს 60 თანამშრომლისთვის, ფოიეს და ავტოსადგომს. შენობას მუქი ფერის პანელებით მოპირკეთებული ჩარჩო აქვს, შიდა სტრუქტურა კი მინის არის, რაც მის გამჭვირვალობას ქმნის. მოცულობები ისე არის განლაგებული, რომ ისინი ქმნიან ტერასებსა და აივნებს. შენობისთვის არქიტექტორებმა უფრო მკაცრი შესახედაობის ფორმა და მასალა აირჩიეს ფუნქციიდან გამომდინარე ინტერიერშიც და ექსტერიერშიც.
Housing in Tbilisi / Studio Arci
Studio Arci-ის 2006 წლის საცხოვრებელი კომპლექსტი ვაკეში, ყიფშიძის ქუჩაზე მდებარეობს. მიწის ნაკვეთს, რომელზეც შენობა მდებარეობს აქვს სამკუთხა ფორმა, რამაც განსხაზღვრა შენობის ასეთი ფორმა. საცხოვრებელი შენობა თავისი პარამეტრებით წარმოადგენს კონსტრუქციას, რომელსაც გარდამავალი ფორმა აქვს და ნაკვეთის უფრო განიერ მხარეს მაღლდება. პირველი სართულის ბინებს აქვთ თავიანთი პატარა მწვანე ეზოები, საოფისე და კომერციული ნაწილი კი განლაგებულია დამოუკიდებელ ბლოკში. შენობის კონსტრუქცია მონოლითური ბეტონის არის, რომლის ელემენტებიც ფასადზე ხელუხლებლად არის დატოვებული.
ფოტოგრაფი: გიორგი მამასახლისი
