„ნემსიყლაპიას სახლის“ სახელით ცნობილი ეს პროექტი უაიტფიშში, ამერიკის შეერთებულ შტატებში მდებარეობს და მისი ფართობი დაახლოებით 604 კვადრატულ მეტრს მოიცავს. დასასვენებელი, საკურორტო სახლის პროექტი იდეალისტური კონცეფციით ცნობილ არქიტექტურულ სტუდიას, Olson Kundig-ს ეკუთვნის.
სახლი ფიჭვის ტყესა და ტბას შორის, ორ განსხვავებულ ეკოლოგიურ ზონაშია მოქცეული. ამ უნიკალურმა ლოკაციამ განაპირობა სახლის მასალებისა და ექსტერიერ-ინტერიერთან დაკავშირებული გადაწყვეტილებების უმეტესობა. სახლი ახალგაზრდა ოჯახს ეკუთვნის, რომელსაც ძალიან სურდა ქალაქური ცხოვრებისგან განსატვირთად თავშესაფარი ჰქონოდა. არქიტექტორები მათ სურვილს პატივისცემითა და პასუხისმგებლობით მიუდგნენ.
შენობის ექსტერიერი ამინდის მიხედვით იცვლება და ამასთან ერთად სახლს ტყის ნაწილად აღგვაქმევინებს. სახლი თავისუფალი, ღია დაგეგმარებით გამოირჩევა, მასში გაერთიანებულია სასტუმრო და სასადილო ოთახები. ეს სივრცე მაღალი ჭერითა და გილიოტინის ტიპის ფანჯრებით გამოირჩევა. სახლის გამჭვირვალე მინის ფანჯრების წყალობით, სახლიდან შესაძლებელია ტბის ხედით ტკბობა. როცა სახლის ორივე კედელი-ფანჯარა ღიაა, იქმნება სრულად მომნუსხველი ილუზია იმისა, რომ შენობა ტყეში ტივტივებს.
‘ნემსიყლაპიის სახლში’ ბუნება უმთავრესი ელემენტია. ერთი შეხედვითაც ჩანს, რომ ის სრულადაა ჩაკარგული ტბისა და ტყის სილამაზეში, თუმცა ამასთან ერთად მისი გარე ტერასით გავდივართ ადგილობრივი მცენარეებით სავსე ბაღში. ამ გზით სახლის ბინადრები ყველა ამინდსა თუ სეზონზე ინარჩუნებენ კავშირს გარემოსთან, რისი საჭიროება და მნიშვნელობა განსაკუთრებით კოვიდ-19-ს პანდემიამ დაგვანახა.
შენობამდე მისვლა ხრეშის გზითაა შესაძლებელი, რომელიც მინდორზე გადის. გზაზე, სახლის ექსტერიერში გვხვდება კოცონის დასანთებად გამოყოფილი კერა, ცხელი წყლის აუზი და გასარუჯად გამოყოფილი ტერიტორია, რაც მთლიანობაში პროექტს არქიტექტურის მშვენიერ ნიმუშად აქცევს.
ფოტოგრაფი: Nic Lehoux
რუბრიკის წარმდგენია “ალიანს ჯგუფი”
