in

პატარა ბაღის მოწყობის 10 ხერხი

პატარა გამწვანებული ეზო ქალაქის შუაგულში დიდი ფუფუნება და ნუგეშია, მიუხედავად იმისა, რომ ასეთ ნაკვეთში ბევრი არაფერი ეტევა, ბაღ-ბოსტნისთვის კი ადგილი საერთოდ არ არის. თუმცა, ლანდშაფტის დიზაინის ექსპერტების მტკიცებით, იდეალური ბაღის მთავარი შტრიხი სითბო, სიგრილე და არომატების სიმრავლეა. სწორედ ამიტომ, დღეს მინიატურული ბაღების მოწყობის რამდენიმე ეფექტური ხერხის შესახებ გიამბოთ.

1. ბალახი როგორც ლანდშაფტის ძირითადი ელემენტი

პატარა ნაკვეთებში განვითარებული საბილიკე ქსელის დაგეგმვა შეუძლებელია. განაპირა ადგილებში მისასვლელად კი ხშირად ბალახზე სიარული გვიწევს. ამიტომ საუკეთესო არჩევანი სწრაფმზარდი საგაზონე ბალახია, რომელიც ფეხით გათელვას უძლებს.

2. არომატული მწვანილების ბაღი

როზმარინი, პიტნა, ლავანდა, ბაზილიკი – მათთვის სულ რამდენიმე კვადრატულიც კი საკმარისია. მწვანილები სურნელოვანი მცენარეებია და მზე უყვართ. მოძებნეთ მათთვის მოხერხებული ადგილი, მოაწყვეთ ამაღლებული კვალი ან უბრალოდ ერთ ადგილზე შეკრიბეთ მწვანილებიანი ქოთნები და კონტეინერები. მუქი მწვანე სალბი, ოხრახუში და რეჰანის მეწამულის ფერი ფოთლები ერთად ძალიან ლამაზად გამოიყურება.

გახსოვდეთ, რომ მწვანილების სურნელი შეიძლება ძალიან მძფრი იყოს, ამიტომაც მოდის მიუხედავად ნუ მოათავსებთ მათ კალათებით ფანჯრებთან, ვერანდაზე და სახლის ირგვლივ ძალიან ახლოს. არომატული პიტნა და ბარამბო უმჯობესია სხვა მცენარეებისგან განცალკევებით დარგოთ.

3. ოჯახის ხე

მომცრო ბაღშიც კი შესაძლებელია ერთი ასეთი ზრდასრული ეგზემპლიარისთვის ადგილის გამონახვა. იქნბა ეს ქარიზმატული ნეკერჩხალი თუ მოწყენილი ტირიფი, თქვენი გადასაწყვეტია. არ არის გამორიცხული, რომ მინი-ბაღის იერის განმსაზღვრელი სწორედ ის გახდეს და მთელი ლანდშაფტური დიზაინი ამ ხის ირგვლივ მოეწყოს.

4. მარადმწვანე მშვენიერება

პატარა ნაკვეთზე წიწვოვანი კულტურების დარგვით თქვენ ეფექტური კომპოზიციის შექმნას შეძლებთ და ამავე დროს სასარგებლო ადგილს დაზოგავთ. ლამაზი რელიეფის შექმნისა და სივრცის ზონირებისათვის რამდენიმე წიწვოვანი ხეც საკმარისია. ამავე დროს შესაძლებლობა გექნებათ თავი ტოპიარულ ხელოვნებაშიც გამოცადოთ.

5. დეკორატიული ბოსტანი

პატარა მიწის ნაკვეთში დიდი და გრძელი კვალის მოწყობა არ გამოვა, თუმცა მომხიბვლელი დეკორატიული ბოსტნის მოწყობა სავსებით შესაძლებელია. ამისათვის  განსაკუთრებული ჯიშის ბოსტნეულის გამოყენება არ არის აუცილებელი (დეკორატიული კვახი, ყაბაყი, ტკბილი წიწაკა და სხვა.).

ძალიან ლამაზად გამოიყურება უბრალო სტაფილოსა და კომბოსტოს ფოთლები, სხვადასხვა ფერის პომიდორი, ასევე ჩინური ხახვი და კამა. შესაძლებელია ბარდას დათესვაც.

6. ქოთნების ბაღი ტერასაზე

ტერასის მოწყობა მცენარეებით შემკული პერგოლითაა შესაძლებელი. ასეთი გამწვანება სივრცეს ზღაპრულობას შემატებს. შესაძლებელია პერიმეტრზე ყვავილების ბორდიურის მოწყობაც.

ყველაზე მარტივი ხერხი ქოთნების ბაღის მოწყობაა. ქოთნებში დარგული მცენარეები, რომლებსაც ზამთარს ოთახში ატარებინებთ სხვადასხვა სიმაღლეზე დაალაგეთ. თქვენი ოთახის მცენარეები მთელი ზაფხულის განმავლობაში კომფორტულად იქნებიან.

7. აყვავებული ბუჩქები

სოლისტად ეფექტური ბუჩქი შეიძლება გამოდგეს, მაგალითად,  ჰორტენზია. ნიადაგის მჟავიანობის მიხედვით მისი ყვავილები სხვადასხვა ფერს იღებს – ვარდისფერიდან ცისფრამდე, ლამაზია თეთრი ფერებიც. ისინი დიდხანს არ ჭკნება, ხოლო შემდგომ თუ სწორად მოვჭრით და გავაშრობთ, ხმელი მცენარეების ძალიან ლამაზი კომპოზიცია გამოვა.

ასევე არჩევანი შესაძლებელია სურნელოვან ბუჩქებზეც შეაჩეროთ: ჟასმინი, იასამანი –  ისინი საჭირო აქცენტებს ქმნიან და სივრცეს არ ტვირთავენ.

8. ბაღი კოლექცია

თუ თქვენ შინაგანად კოლექციონერი ხართ, მაშინ თქვენი ნაკვეთი შეგიძლიათ სხვადასხვა მცენარეების ერთი-ორი ეგზემპლიარით თემატურად მორთოთ. შესაძლებელია ვარდებისა და ბურღულეულის კოლექციონირება. თუ თქვენი ნაკვეთი ნესტიანი ან მზის შუქით არასაკმარისად განათებულია, მაშინ დედამიწის სხვადასხვა კუთხიდან ნესტის მოყვარული მცენარეების შეგროვება შეგიძლიათ.

მოდაში კვლავ წიწვოვანი ხეებია – მაგრამ არა უბრალო, რომლებზეც ზემოთ ვისაუბრეთ, არამედ მინიატურული: ეგრეთწოდებული ნანოწიწვოვანი ხეები. ისინი ზრდასრულ ასაკში ტენისის ბურთის ზომას არ ცილდება. მათი მოვლა საკმაოდ საპასუხისმგებლო და სკურპულოზური საქმეა. მნიშვნელოვანია მათი რეგულარული წმენდა და გამხმარი წიწვების მოშორება. სამაგიეროდ, ამ გზით თქვენი მეზობლებისა და სტუმრების სასიამოვნოდ გაკვირვებას შეძლებთ.

9. ხეები და ბუჩქები ნათელი ფერის ქერქით

ლანდშაფტის დეკორატიულობა  მხოლოდ ვეგეტატიური პერიოდით არ უნდა იყოს შეზღუდული. ბოლო ფოთლების დაცვენის შემდეგ ბაღი შიშველი და არაკომფორტული გახდება. თუ თქვენ ისეთ ბუჩქებსა და ხეებს აარჩევთ, რომლებსაც უჩვეულო ფერის ქერქი აქვთ, გაზაფხულამდე მათი მრავალფეროვნებით ისიამოვნებთ.

10. სეზონური ყვავილები და ქოთნები

გაზაფხულზე სცენაზე პირველი ყვავილები გამოდის. ისინი დიდ ადგილს არ იკავებს, მათი განთავსება თავისუფლად შესაძლებელია ხის ყუთში, ქვის ქოთანში ან ცინკის გობში. ყვავილობის შემდგომ კი მათი დეკორაციის შეცვლა მარტივია. ქოთნები და ყუთები სახლის შესასვლელთან, ბაღის ჭიშკართან ან ბილიკის გასწვრივ შეიძლება მოთავსდეს.

 

ქართველი ფოტოგრაფის საუცხოო ინტერიერი თხინვალაში – ინტერვიუ მარიამ სიჭინავასთან

იაპონური რესტორანი სახასიათო ესთეტიკით – Lemon Studio-ს ნამუშევარი